ក្លឹប Liverpool បានប្រកាសជាផ្លូវការថាពួកគេបានចុះកុងត្រាយកខ្សែបម្រើប្រយុទ្ធ Xherdan Shaqiri ពី Stoke City ក្នុងតម្លៃ១៣លានផោន ជាមួយកុងត្រារយៈពេល៥ឆ្នាំ។
កីឡាករវ័យ២៦ឆ្នាំដែលស៊ុតចូលស៊ែបជួយស្វីសឡើងវគ្គ១៦ក្រុម World Cup ជាកីឡាករលេងនៅក្លឹប Stoke City ដែលទើបតែធ្លាក់ទៅលេងនៅលីគលំដាប់ទី២របស់អង់គ្លេស។ ខ្សែបម្រើប្រយុទ្ធ ដែលរកគ្រាប់បាល់បានច្រើនជាងគេឱ្យ Stoke រដូវកាលមុននោះ បានបញ្ជាក់ថារូបគេមិនចង់ទៅលេងនៅលីគក្រោមនោះទេ ដូច្នេះហើយទើបបានជាត្រូវស្វែងរកក្លឹបថ្មី ដើម្បីលេងនៅលីគកំពូលម្ដងទៀត។
តារាឆ្នើមសញ្ជាតិស្វីសនិយាយខ្លួនសប្បាយចិត្តដែលបានមកធ្វើការជាមួយគ្រូបង្វឹកល្អៗនៅ Liverpool ។ រដូវកាលថ្មី ពិតជាពិបាករង់ចាំឱ្យមកដល់មែនទែន ត្បិតអីរូបគេពិតជាចង់លេងនៅមុខអ្នកគាំទ្រដ៏អស្ចារ្យ និងពាក់អាវក្រុម Liverpool ខ្លាំងណាស់។
Xherdan Shaqiri ធ្លាប់លេងឲ្យក្លឹបធំៗជាច្រើនតែមិនសូវជោគជ័យដូចជា Bayern Munich និង Inter Milan ទើបតែនៅ Stoke City ប៉ុណ្ណោះដែលរូបគេលេងជាជម្រើសដំបូងបានទៀងទាត់៕ប្រភព៖ DailyMail