ខ្សែប្រយុទ្ធ Luis Suarez អាចនឹងត្រលប់ទៅលេងនៅស្រុកកំណើតវិញ នៅពេលកុងត្រារបស់គេអស់ជាមួយក្រុម FC Barcelona ដែលនៅសល់១រដូវកាលទៀត។Suarez វ័យ៣៣ឆ្នាំហើយ និងរដូវកាលនេះរូបគេលេងមិនសូវបានល្អដូចរដូវកាលមុនៗនោះទេ ហើយថែមទាំងមានបញ្ហារបួសវះកាត់ជង្គង់ថែមទៀត។ យ៉ាងណាមិញ អតីតកីឡាករ Liverpool រូបនេះ ក៏នៅសល់កុងត្រា១រដូវកាលទៀតជាមួយក្រុម FC Barcelona ដែរ ដែលអាចឱ្យគេលេងនៅអេស្ប៉ាញនៅឆ្នាំក្រោយ។
នៅពេលអស់កុងត្រានេះទៅ ប្រភពជិតស្និទ្ធរបស់កីឡាករមាឌធំនេះ បានបញ្ជាក់ថារូបគេនឹងត្រលប់ទៅលេងនៅក្លឹប Nacional នៅប្រទេសអ៊ុយរុយហ្គាយវិញ។ ក្លឹបនេះ ជាក្លឹបដែលបណ្ដុះបណ្ដាលរូបគេផ្ទាល់តែម្ដង។ Suarez រំពឹងថាអាចបញ្ចប់អាជីពបាន នៅក្លឹបបាល់ទាត់ដែលបានបណ្ដុះរូបគេ៕