ក្របខណ្ឌលីគរបស់អង់គ្លេស បានប្រកាសឱ្យក្លឹបទាំងអស់មិនត្រូវប្រមូលផ្ដុំហ្វឹកហាត់នោះទេ ដោយឱ្យកីឡាករទាំងអស់សម្រាកតែម្ដង ដើម្បីជៀសឆ្ងាយពីមេរោគ Covid-19 ។
ពួកគេនឹងត្រូវចូលហាត់វិញនៅពាក់កណ្ដាលខែឧសភាខាងមុខនេះ ហើយអាចនឹងចូលលេងបន្ដដើម្បីបញ្ចប់រដូវកាលនៅខែមិថុនាឆ្នាំ២០២០ខាងមុខ។ ការធ្វើបែបនេះ គឺដោយសារតែអង់គ្លេស ចាប់ផ្ដើមមើលឃើញពន្លឺនៃការគ្រប់គ្រងមេរោគ Covid-19 បានហើយ។ បើទោះជាដល់ខែមិថុនានោះអាចលេងបានមែន ប៉ុន្តែការប្រកួតទាំងអស់ក៏ត្រូវលេងដោយបិទទ្វា មិនឱ្យអ្នកគាំទ្រចូលទស្សនាផងដែរ។
ការប្រកួតនៅខែមិថុនានោះ អង់គ្លេសគ្រោងប្រើពេល៥៦ថ្ងៃ ដើម្បីលេងឱ្យចប់រដូវកាលចាស់តែម្ដង។ ការធ្វើបែបនេះ គឺដើម្បីឱ្យក្លឹបទាំងអស់ គេចផុតពីការពិន័យឬដកកុងត្រាផ្សាយជាមួយស្ថានីយទូរទស្សន៍។ នារដូវកាលនេះ ប្រសិនបើ Premier League មិនអាចបញ្ចប់រដូវកាលបានទេ ពួកគេនឹងត្រូវសងទៅខាងទូរទស្សន៍វិញប្រមាណជា១ពាន់លានដុល្លារឯណោះ៕ប្រភព៖ DailyMail
