Marcus Rashford បានបង្ហាញការជំរុញចំៗដល់ក្លឹប Manchester United ឲ្យនាំយកមិត្តរួមជម្រើសជាតិរបស់ខ្លួនគឺកីឡាករ Jadon Sancho មកកាន់ទឹកដី Old Trafford នៅអំឡុងទីផ្សារដោះដូរកៀកចូលមកដល់ខាងមុខនេះ។
Rashford បានសរសើរមិនដាច់ពីមាត់លើទម្រង់លេងរបស់ Sancho ដូចទៅនឹងការយល់ឃើញរបស់មតិជាច្រើនទៀតដែរ ពោលគឺពេញចិត្តភាពច្នៃប្រឌិត ការខិតខំលើទីលានរបស់បុរសវ័យ ២០ ឆ្នាំរូបនេះជាខ្លាំង។
ខ្សែប្រយុទ្ធនៅ United បាននិយាយ៖ “Sancho គេជាកីឡាករល្អ ជាកីឡាករជំនាន់ក្រោយមួយ ដែលដាក់ចិត្តចង់អភិវឌ្ឍខ្លួនឲ្យបានល្អ ហើយសង្ឃឹមមុតមាំថាយើងអាចលេងរួមគ្នាបាន នោះវាពិតជារឿងល្អបំផុត”។ នេះជាសារដែល Rashford បានប្រាប់ Bleacher Report អំឡុងពេលវីដេអូផ្សាយផ្ទាល់លើ Instagram។
លោកបន្ថែមថា៖ “Sancho គេពោរពេញដោយភាពច្នៃប្រឌិត ការស្រមើស្រមៃខ្ពស់ រឿងទាំងនេះហើយដែលអ្នកត្រូវធ្វើឲ្យបានល្អនៅយុគសម័យបាល់ទាត់ក្រោយនេះ”។
រំឭកថាកីឡាកររបស់ Dortmund រកបាន ១៧ គ្រាប់និង Assist ១៩ លើក នៅ ៣៥ ប្រកួតសរុបនារដូវកាល ២០១៩/២០ ខណៈកុងត្រាសេសសល់របស់គេត្រូវផុតនៅឆ្នាំ ២០២២៕ ប្រភព៖ Sportsmole