Xavi Hernandez អ្នកចាត់ការនៅក្លឹប Al-Sadd របស់លីគកំពូលកាតាបច្ចុប្បន្ន ជាញឹកញយក៏រមែងផ្សាភ្ជាប់ជាមួយនឹងចចាមអារ៉ាមថាលោកអាចនឹងត្រូវវិលត្រលប់ទៅដឹកនាំក្លឹបចាស់ FC Barcelona ជាពិសេសអំឡុងពេលដែល Valverde ទើបដកចេញក្តៅៗ។
ជាថ្មីម្តងទៀត Xavi ក៏បានបញ្ជាក់ ជុំវិញគម្រោងថ្ងៃអនាគតរបស់ខ្លួន ថាបើបានទៅដឹកនាំនៅ Barcelona មែននោះ លោកនឹងនាំយកកីឡាករកំពូល ៣ រូបដែលនៅតំបន់ប្រយុទ្ធស្លាបមកចូលរួមជាពុំខាន។
ប្រាប់នៅកិច្ចសម្ភាសន៍ជាមួយ La Vanguardia លោក Xavi និយាយ៖ “ខ្ញុំចង់ត្រលប់ទៅ Barca ហើយមើលតាមទម្រង់លេងបច្ចុប្បន្ន ខ្ញុំនឹងចុះហត្ថលេខានាំយកកីឡាករដូចជា Neymar, Sancho និង Gnabry”។
លោកបន្ថែម៖ “ទម្រង់លេងរបស់ Barca គឺល្អខ្លាំងណាស់ ដោយអ្នកចាំទី Ter Stegen ជាអ្នកចាំទីល្អដាច់កេក្នុងលោក ខណៈមានខ្សែការពារស្លាបឆ្វេងល្អដាច់គេ Alba មានការពារកណ្តាល Pique មានបម្រើ Busquets និងប្រយុទ្ធ Messi ថែមទៀត ហើយពេលនេះខ្ញុំមើលឃើញពីអ្វីដែលខ្ញុំអាចផ្តល់ទៅបានជុំវិញការហ្វឹកហាត់កីឡាករ ខណៈដែលខ្ញុំក៏គ្មានទំនាក់ទំនងអាក្រក់អ្វីទៀតជាមួយលោក Bartomeu ពោលទាំងជាមួយ Joan Laporta និង Victor Font សុទ្ធតែល្អៗដូចគ្នា (ប្រធានជាន់ខ្ពស់ក្លឹប)”៕
ប្រភព៖ AF