អាល្លឺម៉ង់បានរំកិលមកឈរនៅលំដាប់ទី ៤ នាមជាប្រទេសដែលមានករណីឆ្លងវីរុសផ្លូវដង្ហើមថ្មី COVID-19 ច្រើនជាងគេ ដោយគិតត្រឹមថ្ងៃទី ២៧ មិនា ឆ្នាំ ២០២០ មានចំនួន ៤៣ ៩៣៨ ករណី ដោយព្យាបាលជោគជ័យ ៥ ៦៧៣ ករណី និងស្លាប់ ២៦៧ ករណី។
ផលប៉ះពាល់ដ៏ធ្ងន់ធ្ងរនេះ ក៏ជះឥទ្ធិពលដល់វិស័យកីឡាបាល់ទាត់ជាខ្លាំងផងដែរ ជាពិសេសគឺបណ្តាក្លឹបតូចៗដែលមានទំហំហិរញ្ញវត្ថុទាប ហើយត្រូវមកជួបប្រទះនឹងការខកខានប្រកួតរយៈពេលយូរថែមទៀត។
ជាកិច្ចសហការដ៏មានតម្លៃមួយ ក្លឹបកំពូលៗចំនួន ៤ មាន Borussia Dortmund, Bayern Munich, Bayer Leverkusen និង RB Leipzig បានចូលរួមជាធ្លុងមួយប្រមូលថវិកាបាន ២០ លានអឺរ៉ូ ក្នុងការជួយផ្គត់ផ្គង់ដល់បណ្ដាក្លឹបទាំងឡាយមិនថានៅលីគលំដាប់មួយ Bundesliga ផ្ទាល់ និងនៅលីគពីរ Bundesliga 2 ដែលកំពុងរងផលប៉ះពាល់ធ្ងន់ធ្ងរដោយសារវីរុសកូរ៉ូណា។
សេចក្តីប្រកាសនេះបានធ្វើឲ្យអ្នកគាំទ្រ បង្ហាញការអរគុណនូវទឹកចិត្តដ៏ធំធេងរបស់ក្លឹបធំៗទាំងអស់ មិនខុសពីពាក្យមួយឃ្លាដែលគេនិយាយថា៖ “មិត្តល្អមិនចោលគ្នានៅគ្រាក្រនោះឡើយ”៕