ខ្សែប្រយុទ្ធ Luis Suarez បានបញ្ជាក់ថារបួសរបស់គេជាទាន់ល្មម សម្រាប់ការបើកឱ្យដំណើរការប្រកួតវិញក្នុងវិស័យបាល់ទាត់អឺរ៉ុបនាពេលខាងមុខ។លីគអឺរ៉ុបទាំងអស់បានផ្អាកការប្រកួតរបស់ខ្លួនអស់ហើយ ដោយសារតែមេរោគ Covid-19 កំពុងឆ្លងរីករាលដាលខ្លាំងពាសពេញពិភពលោក។ ខណៈដែលលីគអេស្ប៉ាញ ត្រូវបានផ្អាក និងរំពឹងថាអាចចូលលេងបានវិញនៅខែមេសាឆ្នាំ២០២០ខាងមុខនេះ។ ជាមួយគ្នានេះ កីឡាករ Suarez របស់ក្រុម Barcelona ដែលបានវះកាត់ជង្គង់កាលពីខែមករាដើមឆ្នាំនេះ បានអះអាងថាទម្រាំតែលីគត្រលប់មកវិញ គឺរូបគេជាសះស្បើយ១០០%ទាន់ល្មមតែម្ដង។
ខ្សែប្រយុទ្ធអ៊ុយរុយហ្គាយខាងលើនេះបាននិយាយថា៖ “គ្រូពេទ្យបានប្រាប់ខ្ញុំថា របួសរបស់ខ្ញុំបានជាសះស្បើយយ៉ាងលឿន ហើយគាត់បានប្រាប់ថាខ្ញុំនឹងអាចចូលទីលានហ្វឹកហាត់វិញឆាប់ៗនេះ។ នៅពេលនេះ គឺចាំតែក្រុមប្រមូលផ្ដុំវិញប៉ុណ្ណោះ ខ្ញុំនឹងអាចចូលជាមួយពួកគេវិញហើយ”៕
ប្រភព៖ DailyMail