ក្នុងរយៈពេល១ឆ្នាំមកនេះ “Unstoppable” Angela Lee ដែលបានតតាំងនឹង “The Panda” Xiong Jing Nan ពីរដងមកនោះគ្រោងជួបគូប្រជែងថ្មីនាពេលខាងមុខ។ ការដឹងតម្រុយនេះបន្ទាប់ពី Denice “The Menace Fairtex” Zamboanga ទទួលជ័យជម្នះនៅក្នុងកម្មវិធី ONE: KING OF THE JUNGLE កាលចុងខែកុម្ភៈ។
ប្រធាននិងជានាយកប្រតិបត្តិ ONE Championship លោក Chatri Sityodtong បានប្រកាសភ្លាមៗ ថា Zamboanga ត្រូវដណ្ដើមខ្សែក្រវាត់ ONE Women’s Atomweight World Title ពី Angela Lee។ កីឡាការិនីវ័យ២៣ ឆ្នាំមកពីហ្វីលីពីនរូបនេះកើនកំណត់ត្រាល្អឥតខ្ចោះ គឺ ឈ្នះ ៧ លើកមិនដែលចាញ់សោះ រួមទាំងការឈ្នះ២លើកជាប់គ្នានៅសង្វៀន The Home Of Martial Arts។ ជាមួយគ្នានេះ Lee បានទទួលស្គាល់ថា Zamboanga ជាគូប្រជែងដ៏ស្រួចស្រាល់បំផុតម្នាក់។
«ខ្ញុំគិតថា Denice ជាតារាកំពុងរះដ៏មានទេពកោសល្យ។ គេជាកីឡាការិនីប្រកួតបានល្អបំផុតក្នុងក្បាច់គុនចម្រុះ ។ ខ្ញុំរំភើបណាស់ដែលអាចជួបរូបគេនៅសង្វៀន ONE។ Denice នៅក្មេង និងស្រេកឃ្លាននឹងជ័យជម្នះ។ ខ្ញុំគិតថាគេជាអ្នកជំនាញនៃក្បាច់គុនចម្រុះជំនាន់ក្រោយ។ ខ្ញុំបានឃើញការប្រកួតរបស់លើកមុនៗ ហើយគេមានបច្ចេកទេសល្អណាស់»។ Lee ថ្លែងបែបនេះ។
ការបង្ហាញខ្លួនដ៏ល្អរបស់ Zamboanga បានធ្វើឲ្យគេចាប់អារម្មណ៍សឹងគ្រប់គ្នា បន្ទាប់ពីឈ្នះពិន្ទុជាឯកច្ឆន្ទលើ កីឡាការិនីជើងខ្លាំងជប៉ុន Mei “V.V.” Yamaguchi ដែលជាកីឡាការិនីម្នាក់ធ្វើឲ្យ Lee មានការប្រកួតប្រជែងខ្លាំងក្នុងការដណ្ដើមខ្សែក្រវាត់ World Championship ចន្លោះពីឆ្នាំ ២០១៦ ដល់ ២០១៨។
“The Menace” បានផ្ដួលកីឡាការិនីជំនាញចំបាប់ជប៉ុនជាពិសេសក្បាច់ចូលចាប់ផ្ដួលគូប្រកួតឲ្យដេកលើក្ដាររេញ។ “Unstoppable” ក៏មិនធម្មតាដែរមុនពេលឈ្នះ និងការពារខ្សែក្រវាត់បានជាបន្តបន្ទាប់។ បែបណាក្ដី Lee ទទួលស្គាល់ថា Denice ជាគូប្រជែងដ៏លំបាកនាពេលខាងមុខ។
«ខ្ញុំគិតថា Denice និងគ្រូបង្វឹករបស់គេធ្វើការបានល្អណាស់ហើយមានផែនការល្អនៅលើសង្វៀនទៀតផង។ គេអាចអនុវត្តន៍ការប្រកួតបានល្អនៅលើសង្វៀន។ Denice ពិតជាគ្រោះថ្នាក់ណាស់ ហើយ ខ្ញុំមិនអាចមើលងាយគេរូបគេបានទេ»។
បែបណាក្ដីការប្រកួតដណ្ដើមខ្សែក្រវាត់នេះមិនទាន់ត្រូវបានបង្ហាញថាត្រូវប្រកួតនៅថ្ងៃណានោះឡើយ ប៉ុន្តែទំនងអាចកើតឡើងមុនពេលថ្ងៃទី ២៩ ខែ ឧសភា ខាងមុខ។ ការប្រកួតនោះទំនងត្រូវរៀបចំឡើង ប៉ុន្តែមិនមានទស្សនិកជនចូលទស្សនានោះឡើយដោយសារការចូលរួមទប់ស្កាត់មេរោគ COVID-19 ។
លើសពីនេះ “Unstoppable” មិនសូវព្រួយបារម្ភប៉ុន្មានឡើយដើម្បីការពារខ្សែក្រវាត់ World Title ប៉ុន្តែ អ្វីដែលសំខាន់ Lee ទទូចឲ្យកីឡាករកីឡាការិនី និង អ្នកគាំទ្រថែរក្សាខ្លួនឲ្យមានសុវត្ថិភាព។
ម្ចាស់ខ្សែក្រវាត់ទទូច ONE Women’s Atomweight World Title ទទូចបែបនេះ ៖«ខ្ញុំជឿជាក់ថា អ្នករាល់គ្នាថែសុខភាពឲ្យបានល្អ និងថែអនាម័យជាប្រចាំនាពេលនេះ។ ខ្ញុំសូមបន់ស្រន់ឲ្យអ្នកមានជំងឺ កូរ៉ូណា ឆាប់ជាសះស្បើយ»។