សហព័ន្ធបាល់ទាត់អ៊ីតាលី FIGC ដែលមានប្រធានដឹកនាំលោក Gabriele Gravina បានបញ្ជាក់ជាថ្មីម្តងទៀត ពាក់ព័ន្ធស្ថានភាពនៃការប្រកួតបាល់ទាត់លីគកំពូល Serie A ដែលបច្ចុប្បន្នកំពុងផ្អាកជាបណ្តោះអាសន្ន ក្រោយនៅអ៊ីតាលីផ្ទុះមានអ្នកបាត់បង់ជីវិតដោយសារកូវីដ១៩ ខ្ទង់ពាន់នាក់។
នៅដំណាក់កាលដំបូងតាមសេចក្តីប្រកាសគឺគ្រប់ព្រឹត្តិការណ៍កីឡានៅអ៊ីតាលីទាំងអស់ត្រូវផ្អាកដល់ថ្ងៃទី ៣ មេសា ប៉ុន្តែតាមការបញ្ជាក់ចុងក្រោយនេះ លោកបានបង្ហើបនូវផែនការណ៍ថ្មីមួយទៀតទុកជាមុនហើយស្រេច។
លោក Gravina និយាយ៖ “យើងកំពុងដុតដៃដុតជើងថានឹងចាប់ផ្តើមគ្រប់យ៉ាងឲ្យបានម្តងទៀតនៅថ្ងៃទី ២ ឧសភាតទៅ ហើយប្រសិនរដូវកាលមិនអាចបញ្ចប់ត្រឹមថ្ងៃទី ៣០ មិថុនាទេនោះ យើងនឹងបញ្ចប់ឲ្យបានត្រឹមខែកក្កដាតាមដែលអាចទៅរួច”។
រំឭកថាមាន ៨ ក្រុមនៅ Serie A បច្ចុប្បន្នសេសសល់ការប្រកួតក្នុងដៃ ១៣ ប្រកួត ខណៈក្រុមឯទៀតសល់ ១២ ហើយក្នុងនោះក៏មាន ៤ ក្រុមកំពុងជាប់ភារកិច្ចនៅប្រកួតពានរង្វាន់អឺរ៉ុប នៅ Coppa Italia ជាដើមថែមទៀតផង៕
ប្រភព៖ BeSoccer