ក្រុមបាល់ទាត់ជម្រើសជាតិបារាំង បានយកឈ្នះលើក្រុមបែលហ្សិក ១-០ ឡើងទៅវគ្គផ្ដាច់ព្រ័ត្រពានរង្វាន់ FIFA World Cup 2018 ហើយ កាលពីយប់មិញនេះ។
ដើមតង់ទី១ បែលហ្សិកហាក់ធ្វើបានល្អ និងវាយសម្រុកយ៉ាងខ្លាំងទៅលើក្រុមបារាំង។ យ៉ាងណាមិញ ការវាយសម្រុកខ្លាំងនោះ មិនទទួលបានផលឡើយ ដោយរក្សាត្រឹម០-០ ប៉ុណ្ណោះនៅតង់ទី១។ ឈានជើងចូលដល់តង់ទី២ អ្វីៗចាប់ផ្ដើមប្រែប្រួល ខណៈដែលបារាំង បានប្ដូរយុទ្ធសាស្ត្រលេង ហើយក៏ទទួលបានផលតែម្ដង ដោយខ្សែការពារ Sumuel Umtiti លោតតែតចូលទីបានសម្រេចនៅនាទី៥១។ ក្រោយពីបាន១គ្រាប់នេះហើយ បែលហ្សិកចាប់ផ្ដើមវាយបកទៀត ប៉ុន្តែមិនអាចទម្លាយសំណាញ់ទីរបស់បារាំងបានឡើយ។ ចប់ការប្រកួត បារាំង ១-០ បែលហ្សិក។
ជ័យជម្នះនេះដែរ បានធ្វើឱ្យប្រជាជនបារាំងសប្បាយចិត្តជាខ្លាំង។ អ្នកមានគាំទ្ររាប់ម៉ឺននាក់ តាមចេញដើរតាមដងផ្លូវ ដើម្បីជាការអបអរចំពោះជ័យជម្នះដ៏ធំធេងនេះ។ នៅវគ្គផ្ដាច់ព្រ័ត្រពួកគេរំពឹងថា បារាំងនឹងអាចយកពាន World Cup ត្រលប់មកស្រុកវិញបាន បើទោះជាប៉ះជាមួយអង់គ្លេស ឬក្រូអាតក៏ដោយ។ បារាំង បានឡើងវគ្គផ្ដាច់ព្រ័ត្រ ហើយត្រូវរង់ចាំ១ក្រុមទៀត រវាងអង់គ្លេស និងក្រូអាត ដែលប្រកួតនៅយប់នេះ៕ប្រភព៖ DailyMail
