លោក Jose Mourinho ហាក់រងសម្ពាធកាន់តែខ្លាំងឡើង ចាប់តាំងពីការដែលខូចជើង Harry Kane និង Heung-min Son ដែលជាចំណែកដ៏សំខាន់មួយនៃក្រុមទាំងមូល។
ដោយឡែកមុនឈានដល់ការប្រកួតជើងទី ២ ទល់ RB Leipzig ដែលកាលពីជើងទី ១ មាន់ខ្នាយមាសចាញ់ក្នុងដីនៅអង់គ្លេស ១-០ ក៏ត្រូវបានលោក Jose Mourinho នៅតែបង្ហាញការជឿជាក់ខ្ពស់ដដែល។
នេះឆ្លើយតបទៅនឹងការអវត្តមានខ្សែប្រយុទ្ធសំខាន់ដល់ទៅ ៣ រូបមាន Kane, Son និង Bergwijn ដោយលោក Mourinho និយាយមុនដល់ការតតាំងនៅទឹកដី Red Bull Arena ថា៖ “ខ្ញុំនៅតែជឿជាក់សម្រាប់ការប្រកួត ទាំងដែល Steven [Bergwijn] គេមិនអាចលេងពេញមួយរដូវកាលសេសសល់ក្តី ដោយយើងទម្លាប់នឹងជួបរឿងបែបនេះទៅហើយ”។
លោកបន្ថែមថា៖ “អ្នកសួរខ្ញុំថាតើអាចរក ២ គ្រាប់យ៉ាងម៉េចបាន ទាំងដែលគ្មាន Kane, Son ឬ Bergwijn តែខ្ញុំថាមានមធ្យោបាយក្នុងការរកគ្រាប់បាល់ផ្សេងៗជាច្រើនទៀត លើសពីនេះកីឡាករ Leipzig ក៏អាចនឹងធ្លោយដូចការដែល Antonio Rudiger ធ្លាប់ស៊ុតបាល់ [Own Goal] ឲ្យយើងក៏ថាបាន”៕ ប្រភព៖ BeSoccer