Lionel Messi បានចូលរួមចំណែករកគ្រាប់បាល់ជ័យជម្នះនៅជំនួប Barcelona-Real Sociedad ដែលរូបលោករកបានមួយគ្រាប់នៅបាល់ពិន័យ ១១ ម៉ែត្រនាទី ៨១។
បាល់មួយគ្រាប់នេះមិនត្រឹមតែយក ៣ ពិន្ទុឲ្យអ្នកមានបុណ្យនោះទេ ទៀតសោតក៏ក្លាយជាគ្រាប់បាល់ទី ៤៣៨ នៅ ៤៧៤ ប្រកួតសរុប ញាំងឲ្យ Messi ប្រែខ្លួនក្លាយជាកីឡាករឈរលំដាប់ទី ១ ជាអ្នកស៊ុតគ្រាប់បាល់ក្នុងលីគច្រើនបំផុតប្រចាំលីគកំពូលទាំង ៥ នៅតំបន់អឺរ៉ុប។
សម្រាប់ Cristiano Ronaldo បានខកខានការរកគ្រាប់បាល់តាំងពីចុងខែកុម្ភៈមកម្ល៉េះ ដែលគ្រាប់បាល់របស់លោកស្ថិតនៅតួលេខ ៤៣៧ គ្រាប់ក្នុង ៥៤០ ប្រកួតតែប៉ុណ្ណោះ ពោលគឺខកខានតាំងពី Serie A ប្រកាសលើកការប្រកួតជាបន្តបន្ទាប់ក្រោយបារម្ភពីការឆ្លងនូវវីរុស COVID-19។
រំឭកដែរថានៅអ៊ីតាលីមកទល់ថ្ងៃទី ៨ មិនា ២០២០ នេះ មានអ្នកបាត់បង់ជីវិតដោយសារវីរុសផ្លូវដង្ហើមថ្មីចំនួន ២៣៣ នាក់ហើយ ពោលជាប្រទេសទីពីរបន្ទាប់ពីប្រទេសចិនដែលមានអ្នកស្លាប់ច្រើនបំផុតក្នុងលោក៕
ប្រភព៖ AF