ខ្សែបម្រើ Bruno Fernandes ថាគោលដៅរបស់គេនារដូវកាលនេះ គឺធ្វើយ៉ាងណាជួយក្រុម Manchester United ឱ្យមានកៅអីលេងពានរង្វាន់ UEFA Champions League រដូវកាលក្រោយ។
កីឡាករសញ្ជាតិព័រទុយហ្គាល់ខាងលើនេះ កំពុងមានទម្រង់លេងល្អមែនទែន ចាប់តាំងពីផ្លាស់មកលេងនៅ Old Trafford កាលពីខែមករាកន្លងទៅ ក្នុងតម្លៃខ្លួន៦៨លានផោន។ រូបគេតែងតែបញ្ជូនបាល់និងរកគ្រាប់បាល់ជួយក្រុមក្នុងប៉ុន្មានប្រកួតកន្លងមក ហើយជាប់ឈ្មោះជាកីឡាករល្អប្រចាំប្រកួតច្រើនដងផងដែរ។
កីឡាករវ័យ២៥ឆ្នាំខាងលើនេះ បាននិយាយពីអារម្មណ៍ខ្លួនឯងថា៖ “ខ្ញុំសប្បាយចិត្តនៅពេលជួយក្រុមបានច្រើន។ ខ្ញុំមកទីនេះ ដើម្បីពង្រឹងសមត្ថភាព និងជួយ United ឱ្យបានលេង UEFA Champions League នៅរដូវកាលក្រោយ។ ខ្ញុំជឿជាក់ថា សមត្ថភាពរបស់ខ្ញុំនឹងបន្ដរីកចម្រើនទៅមុខទៀតជាមួយក្រុមបិសាចក្រហម”។
Man Utd បច្ចុប្បន្នឈរនៅលេខ៥ក្នុងតារាង Premier League ដោយចាញ់ពិន្ទុក្រុមលេខ៤ Chelsea ៣ពិន្ទុ ឆ្លងកាត់ការប្រកួត២៨ប្រកួតកន្លងមកនេះ៕ប្រភព៖ Dailymail