​៥​យ៉ាង ​អ្នក​ប្រហែល​មិន​ដឹង​ពី​គ្រូ​បង្វឹក​ថ្មី​របស់​ជម្រើស​ជាតិ​អេស្ប៉ាញ

សហព័ន្ធ​បាល់ទាត់​អេស្ប៉ាញ ​បាន​ប្រកាស​តែងតាំង​លោក Luis Enrique ធ្វើ​ជា​គ្រូ​បង្វឹក​ថ្មី ​បន្ទាប់​ពី​ក្រុម​ខ្លាំង​មួយ​នេះ​ធ្វើ​មិន​បាន​ល្អ​នៅ​ព្រឹត្តិការណ៍ World Cup 2018 ​មក។

ប្រិយមិត្ត​ប្រហែល​ជា​ស្គាល់​ច្បាស់​ថា ​Luis Enrique ជា​អតីត​គ្រូ​បង្វឹក​របស់​ក្រុម FC Barcelona ។ ប៉ុន្តែ​នៅ​មាន​រឿង​ជា​ច្រើន​ទៀត ពី​បុរស​ម្នាក់​នេះ ដែល​បងប្អូន​ដែល​ជាមិន​ទាន់​បាន​ដឹង​នៅ​ឡើយ៖

១ ជា​កីឡាករ​ទី​៣​លេង​ឱ្យ Real Madrid ​ផង ​និង Barcelona ​ផង

​នៅ​ឆ្នាំ​១៩៩៥  Enrique ​គឺ​ជា​កីឡាករ​ម្នាក់​រក​គ្រាប់​បាល់​បាន​ក្នុង​ជ័យជម្នះ Real Madrid ៥-០ ​Barcelona ។ ​ក្រោយ​ពី​នោះ​មក នៅ​ឆ្នាំ ១៩៩៦ ​លោក​បាន​សម្រេច​ចិត្ត​ចេញ​ពី Real Madrid ​ដើម្បី​ទៅ​ចួល​រួម​ជាមួយ Barcelona ។ ការ​សម្រេច​ចិត្ត​ទៅ​នេះ ​បាន​ធ្វើ​ឱ្យ​លោក​ក្លាយ​ជា​កីឡាករ​ទី​៣ ​ផ្លាស់​ពី Real ​ទៅ Barca ​បន្ទាប់​ពី  Josep Canal ​និង​ Lucien Muller។

២ ​គាត់​ត្រូវ​បាន​គេ​ហៅ​ថា Ironman

Enrique ​ពិត​ជា​មនុស្ស​ត​ស៊ូ​ខ្លាំង​ណាស់។ ​លោក​ធ្លាប់​ហែល​ទឹក​ជាង​៣​គីឡូម៉ែត្រ ​និង​ជិះ​កង់​បាន​១៨០​គីឡូម៉ែត្រ ​ដោយ​មិន​ឈប់​ម្ដង​ថែម​ទៀត​ផង។ ​មិន​ត្រឹម​តែ​ប៉ុណ្ណោះ ​បុរស​ម្នាក់​នេះ ក៏​ធ្លាប់​ចូល​រួម​រត់​ម៉ារ៉ាតុន​ផង​ដែរ។ កត្ដា​ទាំង​អស់​នេះ​ហើយ ​ត្រូវ​បាន​គេ​ដាក់​ឈ្មោះ​ឱ្យ​លោក  Enrique ​ថា​ជា Ironman ។

៣ មូលហេតុ​ដែល​លោក​​តែងតែ​ពាក់​វ៉ែនតា​ខ្មៅ

មូលហេតុ​ដែល​លោក​​តែងតែ​ពាក់​វ៉ែនតា​ខ្មៅ ​ព្រោះ​ថា​ភ្នែក​របស់​លោក Enrique ​មាន​បញ្ហា​ Pterygium (ត្រូវ​ថ្ងៃ​ខ្លាំង​មិន​បាន)។ ដូច្នេះ​ហើយ ទើប​បាន​ជា​រាល់​ពេល​ហ្វឹកហាត់​ក្រោម​កម្ដៅ​ថ្ងៃ លោក​តែងតែ​ពាក់​វ៉ែន​តា​ជា​និច្ច។

៤ ​ជា​គ្រូ​បង្វឹក​តានតឹង​ពេល​ហ្វឹកហាត់

កាល​ពី​ដឹក​នាំ​ក្រុម Celta Vigo ​និង FC Barcelona ​លោក Enrique ​តែងតែ​បំពាក់ Camera ​នៅ​កន្លែង​ហ្វឹកហាត់​ជា​និច្ច។ ​ការ​ធ្វើ​ដូច្នេះ គឺ​ដើម្បី​មើល​កីឡាករ​គ្រប់គ្នា ថា​តើ​ពួកគេ​មាន​បញ្ហា​អ្វី ​និង​ប្រឹងប្រែង​ហ្វឹកហាត់​កម្រិត​ណា។

៥ ​ជា​កីឡាករ​ជម្រើស​ជាតិ​អេស្ប៉ាញ

កាល​នៅ​ជា​កីឡាករ ​លោក Enrique ​លេង​នៅ​តំបន់​បម្រើ​ប្រយុទ្ធ​។ លោក​ជាប់​ជា​ជម្រើស​ជាតិ​អេស្ប៉ាញ តាំង​ពី​ឆ្នាំ​១៩៩១ ​រហូត​ដល់​២០០២។ បង្ហាញ​ខ្លួន​បាន​៦២​ប្រកួត ​និង​រក​គ្រាប់​បាល់​បាន​១២​គ្រាប់៕

 

ភ្ជាប់ទំនាក់ទំនងជាមួយ CTS SPORT