ខ្សែការពារក្លឹប Paris Saint-Germain កីឡាករ Marquinhos បានបង្ហាញការយល់ឃើញថាប្រសិនស្ថិតក្នុងករណីចាំបាច់ដែលកីឡដ្ឋានត្រូវបិទទ្វារមិនឲ្យមានអ្នកទស្សនាចូលរួមនៅជំនួប PSG-Dortmund នាជើងទី ២ នោះគួរតែលុបចោលការប្រកួតនោះល្អជាង។
កន្លងមកនៅអ៊ីតាលីបានប្រកាសរួចមកហើយថាបិទកីឡដ្ឋានសម្រាប់ប្រកួតចំនួន ៥ លុះក្រោយមកក៏សម្រេចពន្យារពេលទៅពាក់កណ្ដាលខែឧសភាវិញ។ ដោយឡែកសម្រាប់ PSG ដែលនឹងត្រូវបើកកីឡដ្ឋានស្វាគមន៍ Dortmund នៅ Parc des Princes នាថ្ងៃទី ១១ មិនា ក៏មិនទាន់ប្រាកដប្រជាច្បាស់ការនោះដែរ ទន្ទឹមដែលជើងទី ១ ក្លឹប PSG បានបរាជ័យក្រោមថ្វីជើងម្ចាស់ផ្ទះ ២-១។
ខ្សែការពារសញ្ជាតិប្រេស៊ីលបាននិយាយក្រោយយកឈ្នះ Dijon នៅ Ligue 1 លទ្ធផល ៤-០ ថា៖ “វាពិតជាអាម៉ាស់បំផុត ប្រសិនតម្រូវឲ្យលេងដោយគ្មានអ្នកគាំទ្រ ហើយខ្ញុំគិតថាយល់ល្អគួរលុបចោលការប្រកួតនោះល្អជាង ព្រោះយើងត្រូវការអ្នកគាំទ្រ ហើយអ្នកគាំទ្រផ្ទាល់ក៏ចង់នៅក្នុងទិដ្ឋភាពប្រកួតនោះដូចគ្នា”។
លោកបន្ថែមថា៖ “ខ្ញុំសង្ឃឹមថាវានឹងមិនកើតឡើងនោះទេ ហើយប្រសិនការសម្រេចនេះត្រូវបានធ្វើដូចបញ្ជាក់ខាងលើ ខ្ញុំគិតថាពួកយើងនឹងស្នើឲ្យលុបចោលការប្រកួត រហូតទល់បានលេងទល់មុខអ្នកគាំទ្ររបស់យើង”។
គួរបញ្ជាក់ថានៅបារាំងគិតត្រឹមថ្ងៃទី ១ មិនា ឆ្នាំ ២០២០ នេះ គឺមានករណីអ្នកឆ្លងវីរុស COVID-19 ចំនួន ១០០ ករណី ក្នុងនោះក៏ទទួលការព្យាបាលជោគជ័យចំនួន ១២ ករណីរួចមកហើយ៕
ប្រភព៖ AF
