• Hazard ថា​ចាញ់​ឬ​ឈ្នះ​បារាំង​ល្ងាច​នេះ ​គឺ​អាស្រ័យ​លើ​ទម្រង់​លេង Kante

    ក្រុម​បាល់ទាត់​ជម្រើស​ជាតិ​បែលហ្សិក ​នឹង​ត្រូវ​ប្រកួត​ជាមួយ​ក្រុម​បារាំង ​នៅ​ម៉ោង​១​រំលង​អាធ្រាត្រ​នេះ​ហើយ ​ក្នុង​វគ្គ​ពាក់​កណ្ដាល​ផ្ដាច់ព្រ័ត្រ FIFA World Cup 2018 ។

    មុន​ការ​ប្រកួត​ខាង​លើ​ឈាន​ចូល​មក​ដល់ Eden Hazard ​កីឡាករ​សំខាន់​ម្នាក់​របស់​ក្រុម​ជម្រើស​ជាតិ​បែលហ្សិក ​ជឿ​ជាក់​ថា N’Golo Kante ​គឺ​ជា​កីឡាករ​សំខាន់​ម្នាក់​សម្រាប់​បារាំង បើ​រូបគេ​លេង​ល្អ​នៅ​ប្រកួត​នេះ ​នោះ​បែលហ្សិក នឹង​មិន​ងាយ​យក​ឈ្នះ​បារាំង​បាន​ឡើយ។ ផ្ទុយ​ទៅ​វិញ ​បើ Kante ​លេង​មិន​ល្អ ​នោះ​បារាំង​នឹង​ត្រូវ​ត្រលប់​ទៅ​ផ្ទះ​វិញ​នៅ​ត្រឹម​វគ្គ​នេះ​ហើយ។

    Hazard ​បាន​និយាយ​បន្ដ​ប្រាប់​ទៅ BeIN Sport ​ថា​៖ “គាត់​ជា​កីឡាករ​ល្អ​បំផុត​ក្នុង​តំណែង​បម្រើ​ការពារ។ ខ្ញុំ​បាន​លេង​ជាមួយ​គាត់​ច្រើន​ឆ្នាំ ​ពេល​ដែល​គាត់​លេង​ល្អ ​នោះ​អ្នក​នឹង​មាន​សង្ឃឹម​៩៥%​ដើម្បី​ឈ្នះ​ការ​ប្រកួត។ ត្រលប់​មក​វិញ ​ជម្រើស​ជាតិ​បារាំង ​ក៏​ដូច្នេះ​ដែរ បើ​គាត់​លេង​ល្អ ​នោះ​យើង​នឹង​ពិបាក​ក្នុង​ការ​យក​ឈ្នះ”។

    Kante ​វ័យ​២៧​ឆ្នាំ ​បាន​ជាប់​ជម្រើស​ជាតិ​បារាំង​នៅ​ឆ្នាំ​២០១៦ ​ពោល​គឺ​ក្រោយ​ពី​រូបគេ​បាន​ជួយ​ក្រុម Leicester City ​លើក​ពាន English Premier League ។ ​ក្រោយ​ពី​នោះ ​ក៏​បាន​សម្រេច​ចិត្ត​ទៅ​លេង​ឱ្យ​ក្លឹប Chelsea ​វិញ ​ដែល​មាន​វត្តមាន​របស់ Hazard ​នៅ​ទី​នោះ​ដែរ។ ​ក្រោម​ការ​ដឹក​នាំ​របស់​លោក​ Conte ​នា​រដូវ​កាល​ដំបូង​របស់ Kante ​ក៏​បាន​បន្ដ​លើក​ពាន Premier League ​ទៀត៕ប្រភព៖ DailyMail

     

     

     

     

    ភ្ជាប់ទំនាក់ទំនងជាមួយ CTS SPORT