(វីដេអូ) ត្បិត​បញ្ចប់​លទ្ធផល ១-១ តែ Barca បាត់​ជើង​ខ្សែ​បម្រើ​សំខាន់​នៅ​ជើង​ទី ២

ការ​ប្រកួត​រវាង Napoli និង Barcelona បាន​បញ្ចប់​ទៅ​ក្នុង​លទ្ធផល ១-១ ​ប៉ុន្តែ​បាន​បន្សល់​កាត​ក្រហម​មួយ​ដូច​នៅ​ជំនួប Chelsea-Bayern ដែរ ពោល​គឺ​ធ្លាក់​ទៅ​លើ​កីឡាករ Arturo Vidal នៅ​កៀក​ចុង​បញ្ចប់​ការ​ប្រកួត​ទៅ​ហើយ​នោះ។

សាច់​បាល់​លេង​កាល​ពី​យប់​មិញ គឺ​ក្រុម​ភ្ញៀវ​ហាក់​គ្រប​ដណ្ដប់​លើ Napoli ច្រើន​ជាង ដោយ​មាន​ស្ថិតិ​គ្រប់គ្រង​បាល់​ប្រមាណ ៦៧ ភាគរយ ជាមួយ​ការ​ស៊ុត ៨ លើក ចំ​គោលដៅ ២ លើក ទន្ទឹម​ដែល​ម្ចាស់​ផ្ទះ​គ្រប់គ្រង​បាល់ ៣៣ ភាគរយ ស៊ុត ៧ លើក ចំ​គោលដៅ ៤ លើក។

គ្រាប់​បាល់​សម្រេច​ទី​ធ្វើ​បាន​ដោយ​កីឡាករ Dries Mertens នៅ​នាទី ៣០ ​មុន​ពេល Antoine Griezmann តាម​មួយ​គ្រាប់​ស្មើ​មក​វិញ​នៅ​នាទី ៥៧ ប៉ុន្តែ​សោកស្តាយ​នៅ​នាទី ៨៩ Vidal បាន​ទទួល​កាត​លឿង​ទី​ពីរ​ស្មើ​នឹង​កាត​ក្រហម​មួយ ញាំង​ឲ្យ​ប្រកួត​ក្រោយ​របស់​គេ​ត្រូវ​បាន​ខកខាន។

លើសពីនេះអ្នកមានបុណ្យគឺត្រូវបាត់បង់ជើងឆ្នើមនៅតំបន់បម្រើមួយរូបទៀត គឺ Sergio Busquets ដែលលោកបានទទួលកាតលឿងទី ៣ នៅប្រកួតយប់មិញ ដោយកន្លងមកធ្លាប់ពិន័យកាតលឿង ២ ប្រកួតរួចមកហើយនាវគ្គជម្រុះក្នុងពូល។ (ច្បាប់របស់ UEFA កីឡាករបានកាតលឿង ៣ ប្រកួត ត្រូវព្យួរឈ្មោះមួយប្រកួតនៅប្រកួតបន្ទាប់)

ទស្សនា​វីដេអូ​ខាង​ក្រោម៖

រំឭក​ថា​ការ​ប្រកួត​ជើង​ទី ២ រវាង​ក្រុម​ទាំង​ពីរ​ខាង​លើ​នឹង​ធ្វើ​ឡើង​នា​ថ្ងៃ​ទី ១៩ មិនា ​ស្រប​ពេល​គូ Chelsea-Bayern ​ធ្វើ​ឡើង​ក្នុង​ថ្ងៃ​តែ​មួយ​នោះ​ដូច​គ្នា ហើយ​មាន​ផ្សាយ​ផ្ទាល់​លើ​ទំព័រ CTS Sports៕

ភ្ជាប់ទំនាក់ទំនងជាមួយ CTS SPORT