ក្រុមបាល់ទាត់ជម្រើសជាតិក្រូអាត នឹងត្រូវប្រកួតជាមួយក្រុមជម្រើសជាតិអង់គ្លេស នៅវគ្គពាក់កណ្ដាលផ្ដាច់ព្រ័ត្រពានរង្វាន់ FIFA World Cup 2018 នៅប្រទេសរុស្ស៊ី។
អង់គ្លេស កំពុងមានទម្រង់លេងល្អ ហើយសមាជិកក្រុមមួយនេះ រំពឹងថានឹងឆ្លងផុតក្រុមក្រូអាត ហើយលើកពាន World Cup ឆ្នាំនេះតែម្ដង ដើម្បីកសាងប្រវត្តិសាស្ត្រថ្មី។ ទន្ទឹមនឹងអង់គ្លេស បោះពាក្យដូច្នេះដែរ ខាងក្រូអាត ក៏មានសង្ឃឹមដូចគ្នា ថាអាចយកឈ្នះអង់គ្លេសបាន ដើម្បីឡើងវគ្គបន្ដ។ លោក Zlatko Dalic គ្រូបង្វឹកក្រូអាត បានបញ្ជាក់ថាមកដល់វគ្គនេះហើយ គឺក្រុមទាំងអស់ មានសង្ឃឹម៥០%ដូចគ្នា គ្មានក្រុមណាមានប្រៀបជាងក្រុមណាឡើយ។
គ្រូបង្វឹកដែលដឹកនាំក្រុមយកឈ្នះលើអាហ្សង់ទីន ៣-០ នៅវគ្គសន្សំពិន្ទុក្នុងពូល បាននិយាយថា៖ “យើងមិនខ្លាចអង់គ្លេសឡើយ។ Kane គាត់ជាអ្នករកគ្រាប់បាល់បានច្រើនជាងគេ យើងមិនងាយបិទគាត់ទេ ប៉ុន្តែយើងមានកីឡាករល្អនៅតំបន់ការពារកណ្ដាល យើងអាចបិទ Messi និង Eriksen បាន។ ដូច្នេះ ខ្ញុំសង្ឃឹមថាយើងក៏អាចបិទ Kane ជាប់ដូចគ្នា”៕ប្រភព៖ BBC
