Deontay Wilder បានបាត់បង់ខ្សែក្រវាត់ WBC heavyweight របស់ខ្លួន ក្រោយពីចាញ់កីឡាករអង់គ្លេស Tyson Fury កាលពីថ្ងៃសៅរ៍សប្ដាហ៍មុននេះ។
Wilder ក្នុងការប្រកួតលើកទី២ ទល់ Fury នោះ ហាក់ដូចជាមិនមានកម្លាំងដើម្បីប្រកួតឡើយ។ តាំងពីទឹក១រហូតដល់ទឹក៧ Fury បានវាយគ្របលើកីឡាករអាមេរិករូបនេះរហូត។ នៅទឹកទី៧ ដោយសារតែគ្រូបង្ហាត់របស់ Wilder មើលឃើញថាមិនអាចបន្ដឱ្យកូនសិស្សខ្លួនវាយបានទៀត ទើបពួកគេបានសម្រេចគប់កន្សែងស ចុះចាញ់ការប្រកួតតែម្ដង ធ្វើឱ្យ Wilder បាត់បង់ខ្សែក្រវ៉ាត់ទម្ងន់ធ្ងន់របស់ខ្លួន។
យ៉ាងណាមិញ ក្រោយពីប្រកួតចប់ Wilder បានបន្ទោសទៅលើឯកសណ្ឋានតុបតែងខ្លួនរបស់គេ ដែលពាក់ពេលចេញមកប្រកួត។ កីឡាករទើបតែចាញ់១លើកនេះ បញ្ជាក់ថាឯកសណ្ឋាននោះធ្ងន់ពេក ធ្វើឱ្យខ្លួនអស់កម្លាំងច្រើនក្នុងការពាក់វា។ កត្តានេះហើយ ទើប Wilder ហាក់ដូចជាអស់កម្លាំងដើម្បីប្រកួតទល់ Fury ទៅហើយ៕ប្រភព៖ Dailymail