ការប្រកួតកាលពីយប់មិញរវាង Manchester United និង Watford បានបញ្ចប់ទៅនៅលទ្ធផល ៣-០ ដែលទម្រង់លេងរបស់បិសាចហាក់ធ្វើឲ្យអ្នកគាំទ្រមានការពេញចិត្តជាខ្លាំង។
ក្នុងនោះ United ស៊ុតសរុប ២១ ជើងចំគោលដៅ ៩ ជើង បញ្ជូនបាល់ ៥៨៥ លើក ស្ថិតិគ្រប់គ្រងបាល់ ៥៩ ភាគរយ។ ការសម្រេចទីធ្វើបានដោយកីឡាករ Bruno Fernandes, Anthony Martial និង Mason Greenwood។
ដោយឡែកបើតាមការវាយតម្លៃពិន្ទុលើ WhoScored បានបង្ហាញថាចំណូលថ្មី Bruno Fernandes ដែលជាអ្នកស៊ុតមួយ Assist មួយបានជាប់ឈ្មោះ MOTM ដោយមានពិន្ទុ ៩,២ ខ្ពស់ដាច់គេបង្អស់ក្នុងការប្រកួត ខណៈកីឡាករព័រទុយហ្គាល់រូបនេះស៊ុតបាន ៣ ជើង បញ្ជូនបាល់ជោគជ័យ ៧០ ភាគរយ។
អ្នកបន្ទាប់មានដូចជា Greenwood បាន ៨,៩ ពិន្ទុ រីឯ Martial បាន ៨,១ ពិន្ទុ និងខ្សែបម្រើ Matic បាន ៨,០។ ក្នុងនោះកីឡាករលេងនៅតំណែងស្លាប Pereyra របស់ Watford បានពិន្ទុទាបជាងគេត្រឹម ៥,៤ ប៉ុណ្ណោះ៕ ប្រភព៖ WhoScored