• Hazard ​នឹង​អវត្តមាន​យ៉ាង​តិច​២​ខែ​ទៀត ដោយសារ​ប្រេះ​ឆ្អឺង​ជើង​ស្ដាំ​

    ខ្សែ​បម្រើ​ប្រយុទ្ធ Eden Hazard ​បាន​រង​របួស​ប្រេះ​ឆ្អឹង​ជើង​ខាង​ស្ដាំ ​ដោយ​អាច​នឹង​ធ្វើ​ឱ្យ​រូបគេ​អវត្តមាន​យ៉ាង​តិច​២​ខែ​ទៀត​ឱ្យ​ក្រុម Real Madrid ​។​

    ​ក្រុម Real Madrid ​បាន​បរាជ័យ​ក្រោម​ថ្វី​ជើង Levante ​ក្នុង​លទ្ធផល ១-០ ​កាល​ពី​ពេល​កន្លង​ទៅ ​ធ្វើ​ឱ្យ​បាត់​តំណែង​កំពូល​តារាង​ទៅ​ក្រុម Barcelona ​ហើយ។ ​ក្រោយ​ពី​ធ្លាក់​មក​លេខ​២​នេះ​ហើយ ​ក្រុម​របស់​លោក Zidane ​នឹង​អវត្តមាន​កីឡាករ​សំខាន់​របស់​ខ្លួន​ម្នាក់​ទៀត គឺ Eden Hazard ​។ ​កីឡាករ​បែលហ្សិក​រូប​នេះ ​ទើប​ជា​ពី​របួស​ប៉ុណ្ណោះ ប៉ុន្តែ​ក្នុង​ការ​ប្រកួត​កន្លង​ទៅ បាន​រង​របួស​ជា​ថ្មី​ទៀត ​ដោយ​ប្រេះ​ឆ្អឹង​ជើង​ខាង​ស្ដាំ។ ​

    ​របួស​នេះ​នឹង​ធ្វើ​ឱ្យ​រូបគេ​អវត្តមាន​យ៉ាង​តិច​២​ខែ​ឯ​ណោះ។ Hazard ​តាំង​ពី​ផ្លាស់​មក​លេង​នៅ Real Madrid ​មក ក្រៅ​ពី​លេង​មិន​ល្អ​ហើយ រូបគេ​ក៏​មាន​បញ្ហា​របួស​ជាប់​ផង​​ដែរ។ ​កត្តា​របួស​នេះ ​ធ្វើ​ឱ្យ​លោក Zidane ​នឹង​ប្រើ​ប្រាស់​កីឡាករ​យុវជន​របស់​ខ្លួន​ទៀត​ហើយ ​ក្នុង​ការ​ប្រកួត​ទល់​ក្រុម Man City ​និង Barcelona ​នា​ពេល​ខាង​មុខ៕ប្រភព៖ Marca


    ភ្ជាប់ទំនាក់ទំនងជាមួយ CTS SPORT