កីឡាករក្រុមជម្រើសជាតិប្រេស៊ីល បានទៅដល់ស្រុកកំណើតវិញហើយ បន្ទាប់ពីធ្លាក់ពី World Cup 2018 ត្រឹមវគ្គ៨ក្រុមចុងក្រោយ ក្រោមថ្វីជើងរបស់បែលហ្សិក ២-១។
បរាជ័យនេះ បានធ្វើឱ្យកីឡាករជាច្រើននៅក្នុងក្រុមមិនសប្បាយចិត្តនោះទេ ដោយបាននិយាយថាពួកគេពិបាកក្នុងការរកហេតុផលល្អមួយ សម្រាប់បន្ដអាជីពលេងបាល់ទាត់ទៀតណាស់។ តួយ៉ាងដូចជា Neymar ផ្ទាល់ បាននិយាយក្រោយចាញ់ថា រូបគេពិបាករកហេតុផល ដើម្បីមានកម្លាំងចិត្តបន្ដអាជីពបាល់ទាត់ទៀត ព្រោះថា World Cup ឆ្នាំនេះ រូបគេមានក្ដីរំពឹងច្រើនណាស់។
កីឡាករតម្លៃខ្លួនខ្ពស់ជាងគេខាងលើនេះ បញ្ជាក់ថា៖ “នេះជាការឈឺចាប់ និងសោកសៅបំផុតក្នុងអាជីពបាល់ទាត់របស់ខ្ញុំ។ នេះជាការឈឺចាប់ខ្លាំងណាស់ ព្រោះយើងដឹងច្បាស់ថាយើងគួរតែទៅបានឆ្ងាយជាងនេះ។ វាពិតជាពិបាក ក្នុងការរកផ្លូវឱ្យខ្ញុំត្រលប់ទៅលេងបាល់ដូចមុនណាស់”។
ប្រេស៊ីល តែងតែជាក្រុមមួយមានភាគរយខ្ពស់ជាងគេក្នុងការលើកពាន World Cup ជានិច្ច មិនថាឆ្នាំណានោះទេ។ យ៉ាងមិញ ក្រោយពីបានលើកពាននៅឆ្នាំ២០០២មក ពួកគេបានខកខានឱកាសរហូត ជាពិសេសតែងតែធ្លាក់ក្រោមថ្វីជើងរបស់ក្រុមនៅតំបន់អឺរ៉ុប៕ប្រភព៖ DailyMail
