លោក Paco Lopez បានបញ្ជាក់ថាក្រុម Levante របស់លោក មិនប្ដូរគោលដៅនោះទេ ពោលគឺត្រូវតែយកឈ្នះលើក្រុម Real Madrid ឱ្យបាននៅរាត្រីនេះ។
ក្រុម Real Madrid នឹងត្រូវប៉ះក្រុម Levante ក្នុងពានរង្វាន់ La Liga សប្ដាហ៍ទី២៥ វេលាម៉ោង៣រំលងអាធ្រាត្រ។ ក្រុមទាំងពីរនេះដែរ បានប៉ះគ្នាម្ដងមកហើយកាលពីជើងទី១កន្លងទៅ ដោយគ្រានោះក្រុម Real Madrid បានយកឈ្នះក្នុងលទ្ធផល ៣-២។
មុនការប្រកួតនៅរាត្រីនេះចាប់ផ្ដើម លោក Paco ដែលជាអ្នកចាត់ការក្រុម Levante បាននិយាយថា៖ “Madrid ពិតជាក្រុមខ្លាំង ដូច្នេះវានឹងពិបាកសម្រាប់យើង។ យើងនឹងព្យាយាមប្រយុទ្ធបុកពួកគេ និងលេងតាមក្បួនរបស់យើង។ បើទោះជាដឹងថាពិបាកក្នុងយកឈ្នះក៏ដោយ ប៉ុន្តែក្រុមរបស់យើងបានដាក់គោលដៅរួចហើយ គឺត្រូវយក៣ពិន្ទុ”៕ប្រភព៖ MARCA
