Olivier Giroud ខ្សែប្រយុទ្ធជម្រើសជាតិបារាំង បាននិយាយថាពួកគេនឹងបង្ហាញឱ្យវីរបុរស Thierry Henry មានអារម្មណ៍ស្ដាយក្រោយ ដែលជ្រើសរើសទៅធ្វើការជាគ្រូជំនួយឱ្យបែលហ្សិក។
Thierry Henry ជាវីរបុរសរបស់ក្រុមជម្រើសជាតិបារាំង ប៉ុន្តែបច្ចុប្បន្ននេះ រូបគេបានទៅធ្វើជាគ្រួជំនួយនៅជម្រើសជាតិបែលហ្សិក។ ខណៈដែលបារាំង នឹងត្រូវប្រកួតជាមួយក្រុមបែលហ្សិកនៅវគ្គពាក់កណ្ដាលផ្ដាច់ព្រ័ត្រ World Cup 2018 នេះ ហើយ។ ការប្រកួតនេះ បានធ្វើឱ្យមតិជាច្រើន គិតថាតើ Henry នឹងមានអារម្មណ៍យ៉ាងណា ដែលប៉ះបារាំងដូច្នេះ?
ចំពោះរឿងនេះដែរ Giroud ខ្សែប្រយុទ្ធឆ្នើមម្នាក់របស់បារាំង បាននិយាយថា៖ “ខ្ញុំដូចជាមានអារម្មណ៍រំខានណាស់ចំពោះរឿង Henry នេះ។ ខ្ញុំចង់បង្ហាញថា គាត់កំពុងជ្រើសរើសក្រុមខុសហើយ។ ខ្ញុំពេញចិត្ត បើគាត់នៅជាមួយយើង ណែនាំយើង ឱ្យបានល្អ ប៉ុន្តែខ្ញុំក៏មិនច្រណែននឹងការសម្រេចចិត្តរបស់គាត់ដែរ។ យើងមានជម្រើសរៀងៗខ្លួន”។
បុរសវ័យ៤០ឆ្នាំខាងលើនេះ លេងឱ្យជម្រើសជាតិបារាំងតាំងពីឆ្នាំ១៩៩៧ដល់២០១០ បង្ហាញខ្លួនបាន១២៣ប្រកួត និងរកបាន៥១គ្រាប់។ សមិទ្ធផលធំបំផុតរបស់លោក គឺនាំបារាំងលើកពាន World Cup ឆ្នាំ១៩៩៨។ ខណៈដែលបច្ចុប្បន្ន លោកជាជំនួយការគ្រូបង្វឹករបស់បែលហ្សិក ដោយចូលបម្រើការងារនេះតាំងពីឆ្នាំ ២០១៦៕ប្រភព៖ DailyMail
