ជើងចាស់នៅក្លឹបហង្សក្រហមលោក Jamie Carragher បានបង្ហាញការណែនាំដល់ក្លឹបចាស់របស់ខ្លួនក្នុងការចុះហត្ថលេខានាំយកកីឡាករចំណូលថ្មី ២ រូបចូលក្លឹប បន្ទាប់ពីមើលឃើញពីស្ថានភាពដ៏លំបាកមួយក្រោយចាញ់ At Madrid ១-០ កន្លងមក។
ជាទូទៅនៅពេលដែល Liverpool មិនអាចមានកីឡាករ ៣ រូបសំខាន់ Mane, Salah, Firmino លេងជុំជើងគ្នាទេនោះ ប្រព័ន្ធលេងរបស់ក្រុមនឹងរមែងជួបបញ្ហាច្រើនជាងទទួលបានលទ្ធផលវិជ្ជមាន។
ពាក់ព័ន្ធនឹងបញ្ហានេះដែរ លោក Carragher បាននិយាយថា៖ “បើអ្នកមើលការប្រកួតនៅយប់ថ្ងៃអង្គារ [បរាជ័យទល់ At Madrid] វាគឺជាបញ្ហាធំសម្រាប់ Liverpool ដែលមិនអាចឲ្យ ៣ មុខខាងលើលេងជុំគ្នាបាន”។
លោកបន្ថែម៖ “នៅពេលដែល Mane ត្រូវប្តូរចេញហើយយកមកវិញនៅ Divock Origi ដែលគេធ្លាប់ជាវីរបុរសនៅទឹកដី Wanda ឆ្នាំទៅ [វគ្គផ្តាច់ព្រ័ត្រ UCL ១៩/២០] តែក៏នៅតែមិនទាន់ល្អគ្រប់គ្រាន់សម្រាប់ក្លឹបល្អដាច់គេក្នុងលោកនោះដែរ”។
លោកសង្កត់ធ្ងន់៖ “Liverpool ចាំបាច់ត្រូវការខ្សែប្រយុទ្ធកំពូលនៅរដូវក្តៅ តើ Sancho ឬ Werner? ដោយសម្រាប់ខ្ញុំគឺនឹងយកទាំងពីរ ព្រោះរដូវក្តៅកន្លងមកក្លឹបមិនបានចាយលុយទេ អ៊ីចឹងលុយជាច្រើនប្រាកដជាប្រេរង់ចាំហើយស្រេច”។
គួរបញ្ជាក់ថា Jadon Sancho និង Timo Werner កន្លងមកក៏លេចលឺថាស្ថិតក្រោមរ៉ាដាចង់បានពីសំណាក់ក្លឹបបិសាចក្រហម Man Utd ផងដែរ ដោយសម្រាប់ខ្សែប្រយុទ្ធអាល្លឺម៉ង់អាចមានតម្លៃខ្លួនប្រហែល ១០០ លានផោន ខណៈដែលខ្សែប្រយុទ្ធរបស់ RB Leipzig ថ្លៃខ្ទង់ ៥០ លានផោន៕ ប្រភព៖ Metro