ក្រុម Spurs របស់លោក Jose Mourniho នឹងត្រូវបើកកីឡដ្ឋានរបស់ខ្លួន ស្វាគមន៍ក្រុម RB Leipzig នៅម៉ោង៣រំលងអាធ្រាត្រយប់នេះ ក្នុងការប្រកួតវគ្គ១៦ក្រុមចុងក្រោយ ពានរង្វាន់ UEFA Champions League ។
ជាមួយការប្រកួតសំខាន់ចូលមកដល់ Spurs ក៏បានប្រកាសពីដំណឹងអាក្រក់មួយផងដែរ។ ខ្សែប្រយុទ្ធ Son Heung-min បានរងរបួសបាក់ដៃ អំឡុងពេលលេងទល់ Aston Villa ហើយនឹងត្រូវសម្រាករហូតដល់ចប់រដូវកាលនេះ។ ដូច្នេះហើយ ក្រុម Spurs នឹងលេងដោយអវត្តមានខ្សែប្រយុទ្ធសំខាន់របស់ខ្លួន Son និង Kane ចាប់ពីពេលនេះតទៅ។
លោក Jose Morinho បានហៅកាលៈទេសៈនេះថាជាកាលៈទេសៈមួយដែលលោកចូលចិត្តលេងបំផុត។ នៅពេលលោកចូលដឹកនាំ ក្រុម Spurs នៅជាន់ទី១២ ហើយពួកគេស្វះស្វែង ឡើងកាំជណ្ដើររហូតដល់ជាន់ទី៤។ នៅពេលនេះ Spurs បានដល់កន្លែងដែលចង់បាន ប៉ុន្តែសម្រាប់តែមានគេយកជណ្ដើរចេញទៅហើយ ធ្វើឱ្យក្រុមគ្មានផ្លូវអីអាចចុះបានឡើយ។ ស្ថិតនៅជាន់ទី៤នេះ ក្រុម Spurs មានតែ២ជម្រើសប៉ុណ្ណោះ។ ទី១ លោតចុះក្រោម ហើយស្លាប់ និងទី២ ស្វែងរកផ្លូវគ្រប់វិធី ដើម្បីចុះ បើទោះជាប្រថុយនិងស្លាប់ក៏ដោយ។
ត្រង់ចំណុចនេះ លោក Jose ចង់ផ្ដោតថាក្រុមរបស់លោកនឹងលេងដោយគ្មានខ្សែប្រយុទ្ធនោះទេ។ ដូច្នេះហើយ ភាគរយចាញ់មានច្រើនណាស់ ប៉ុន្តែលោកនឹងដឹកនាំក្រុមប្រយុទ្ធដល់វិនាទីចុងក្រោយ៕ប្រភព៖ Dailymail