ខ្សែប្រយុទ្ធ Son រកបានគ្រាប់បាល់ចុងម៉ោង ជួយក្រុម Spurs យកឈ្នះលើក្រុម Aston Villa ក្នុងលទ្ធផល ៣-២ នាការប្រកួតលីគកំពូលអង់គ្លេសនៅយប់មិញនេះ។
ការប្រកួតរវាងក្រុមទាំងពីរនេះ ពិតជាល្អមើលមែនទែន។ ម្ចាស់ផ្ទះ Aston Villa រកគ្រាប់បាល់បានមុននៅនាទី៩ ដែលជាបាល់ចូលទីខ្លួនឯងរបស់ Alderweireld ។ យ៉ាងណាមិញ ខ្សែការពាររូបនេះ ក៏រកបាន១គ្រាប់វិញដែរ នៅនាទី២៧ មុនពេល Son រកគ្រាប់បាល់នាំមុខបាននៅនាទី៤៥+២ ។ ឈានចូលតង់ទី២វិញ Engels របស់ Aston Villa ក៏រកគ្រាប់បាល់តាមស្មើវិញបាន នាទី ៥៣។ ការប្រកួតជិតនឹងចប់ទៅហើយ Son ក៏ថែមគ្រាប់បាល់ជ័យជម្នះឱ្យ Spurs បាននៅនាទី៩០+៤ ដើម្បីចប់ការប្រកួតឈ្នះក្នុងលទ្ធផល ៣-២។
លោក Jose Mourinho អ្នកចាត់ការក្រុម Spurs បាននិយាយក្រោយចប់ការប្រកួតនេះដែរថា វាជាការប្រកួតមួយដែលអ្នកគាំទ្រត្រូវតែមើលឱ្យទាល់តែចប់។ Spurs មិនដែលបោះបង់ការខំប្រឹងប្រែងនោះទេ ពួកគេតែងតែបង្ហាញថាគ្រប់ពេលគឺអាចស្វែងរកជ័យជម្នះបានជានិច្ច៕ប្រភព៖ Dailymail
