គ្រូ​បង្វឹក​ក្រូអាត៖ ​លេង​ជាមួយ​អង់គ្លេស ៥០-៥០ ​គ្មាន​នរណា​មាន​ប្រៀប​ជាង​ទេ

ក្រូអាត បាន​ឡើង​ទៅ​វគ្គ​៤​ក្រុម​ចុង​ក្រោយ​ហើយ ​បន្ទាប់​ពី​ពួកគេ​យក​ឈ្នះ​លើ​ក្រុម​ម្ចាស់​ផ្ទះ​រុស្ស៊ី​ដោយ​ទាត់​បាល់​កាត់​ក្ដី​ប៉េណាល់ទី​ ៤-៣ ​ក្រោយ​ស្មើ​គ្នា ២-២ ​រយៈ​ពេល​១២០​នាទី។

ជ័យជម្នះ​នេះ​ដែរ គឺ​ជា​កំណត់ត្រា​ឡើង​ដល់​វគ្គ​៤​ក្រុម​នេះ​ម្ដង​ទៀត​ហើយ សម្រាប់​ក្រូអាត ​ក្រោយ​ពី​ពួកគេ​ធ្វើ​បាន​កាល​ឆ្នាំ​១៩៩៨។ ​Luka Modric ​ដែល​ជា​ប្រធាន​ក្រុម​ជម្រើស​ជាតិ​ក្រូអាត​បាន​និយាយ​ថា​នេះ​ជា​ការ​ប្រកួត​ស្វិតស្វាញ​បំផុត​សម្រាប់​ក្រុម​របស់​ខ្លួន។ ២​ប្រកួត​ចុង​ក្រោយ​នេះ ​ក្រូអាត​ត្រូវ​លេង​ដល់​១២០​នាទី​ជាប់​គ្នា ប៉ុន្តែ​ពួកគេ​នៅ​តែ​អាច​ធ្វើ​បាន លេង​យ៉ាង​ល្អ និង​នាំ​ក្រុម​ទៅ​វគ្គ​បន្ដ។ ខ្សែ​បម្រើ​រូប​នេះ រំពឹង​ថា​ក្រុម​នឹង​មិន​បញ្ចប់​ត្រឹម​វគ្គ​៤​ក្រុម​នេះ​ឡើយ។

ដោយ​ឡែក​សម្រាប់​លោក  Zlatko Dalic ​វិញ ​បាន​ស្រក់​ទឹក​ភ្នែក បន្ទាប់​ពី Rakitic ​ទាត់​បាល់​ប៉េណាល់ទី​ចូល​យក​ឈ្នះ​លើ​រុស្ស៊ី។ លោក និយាយ​ថា​៖ “វា​មិន​មែន​ជា​ការ​ប្រកួត​ល្អ​នោះ​ទេ ប៉ុន្តែ​វា​ជា​ការ​ប្រកួត​ប្រជែង​ខ្លាំង​បំផុត។ យើង​សំណាង​ណាស់​ដែល​បាន​ឡើង​វគ្គ​បន្ដ។ យើង​នឹង​ត្រូវ​ប៉ះ​ជាមួយ​អង់គ្លេស​ទៀត។ ជាក់​ស្ដែង​មក​ដល់​វគ្គ​នេះ ​គ្មាន​ក្រុម​ណា​មាន​ប្រៀប​ជាង​ក្រុម​ណា​ឡើយ។ យើង​មាន​ក្ដី​រំពឹង ៥០-៥០  ​ដូច​គ្នា​ទាំង​អស់។ យើង​នឹង​ប្រឹងប្រែង ​ហើយ​វា​ជា​ការ​ប្រកួត​ប្រជែង​ធំ​មួយ​ទៀត​សម្រាប់​ក្រូអាត”៕ប្រភព៖ DailyMail

 

 

ភ្ជាប់ទំនាក់ទំនងជាមួយ CTS SPORT