លោក Gareth Southgate គ្រូបង្វឹកក្រុមជម្រើសជាតិអង់គ្លេស បាននិយាយថាក្រុមជម្រើសជាតិ និងអ្នកគាំទ្រអង់គ្លេសទាំងអស់ ចង់ត្រលប់ទៅផ្ទះវិញជាមួយពានរង្វាន់ FIFA World Cup 2018 នេះ។
អង់គ្លេសពិតជាធ្វើបានល្អមែនទែន ដោយបានយកឈ្នះលើក្រុមស៊ុយអែតក្នុងលទ្ធផល ២-០ នាការប្រកួតវគ្គ៨ក្រុមចុងក្រោយនាយប់មិញនេះ។ Maguire តែតចូលឱ្យអង់គ្លេសនាំមុខនៅតង់ទី១ ដែល១គ្រាប់នេះពិតជាធ្វើឱ្យអង់គ្លេសកាន់តែមានទំនុកចិត្តថែមទៀត។ ស្របពេលដែលតង់ទី២ ចូលដល់ Alli រកបាន១គ្រាប់ទៀតនោះ គឺរឹតតែធ្វើឱ្យអង់គ្លេសកក់ក្ដៅឡើងវគ្គពាក់កណ្ដាលផ្ដាច់ព្រ័ត្រហើយ។
លទ្ធផលយ៉ាងល្អនេះដែរ បានធ្វើឱ្យលោក Southgate និយាយថា៖ “នេះជាកំណត់ត្រាថ្មីសម្រាប់ក្រុមអង់គ្លេស។ យើងនឹងបន្ដធ្វើវា ហើយខ្ញុំបានប្រាប់ទៅកីឡាករយើងថា វាមិនមែនជាពេលត្រលប់ទៅផ្ទះវិញពេលនេះទេ។ យើងនៅមានការងារធ្វើបន្ដទៀត។ បើទៅផ្ទះ យើងត្រូវមានអ្វីកាន់នៅដៃសិន”។
អង់គ្លេស នឹងត្រូវប៉ះជាមួយក្រុមក្រូអាត នាវគ្គពាក់កណ្ដាលផ្ដាច់ព្រ័ត្រ FIFA World Cup 2018 នេះ នៅថ្ងៃទី១២ខាងមុខនេះ។ គ្រូបង្វឹកខាងលើបានបង្ហើបចំពោះការប្រកួតនោះដែរថា នឹងក្លាយជាប្រកួតសំខាន់មួយដែលសមាជិកក្រុមទាំងមូលត្រូវផ្ដោតអារម្មណ៍ខ្លាំងបំផុត។ ក្រូអាតជាក្រុមខ្លាំងមួយ ដែលមិនអាចមើលស្រាលបានឡើយ៕ប្រភព៖ DailyMail