លោក Jurgen Klopp មិនបានប្ដូរចិត្តរបស់ខ្លួនពីការសម្រាក មកដឹកនាំក្រុម Liverpool លេងទល់ក្រុម Shrewsbury នៅជើងទី ២ពានរង្វាន់ FA Cup នោះទេ។
ប៉ុន្តែលោកនឹងប្រើយុទ្ធសាស្ត្រថ្មី ដោយទូរសព្ទឬ VDO Call ទៅណែនាំក្រុមតែម្ដង ខណៈដែលលោកនឹងតាមដានការប្រកួតនេះតាមទូរទស្សន៍។ ដោយក្រុម Liverpool ក្រោមអាយុ២៣ឆ្នាំនឹងចូលលេងពានរង្វាន់នេះ ដឹកនាំដោយលោក Neil Critchley ស្របពេលក្រុមធំនឹងសម្រាកលំហែកាយ១សប្ដាហ៍មុនប្រមូលផ្ដុំវិញ។
រំលឹកថាក្រុម Liverpool លេងស្មើក្រុម Shrewsbury ក្នុងលទ្ធផល ២-២ កាលពីពេលកន្លងទៅ ដូច្នេះពួកគេត្រូវលេងជើងទី២ទៀតដើម្បីកាត់ក្ដីយកក្រុមឈ្នះ។ យ៉ាងណាមិញជើងទី២នេះ លេងនៅយប់នេះឯង ប៉ុន្តែអ្វីដែលប្លែកនោះគឺក្រុមហង្សក្រហមនៅរាត្រីនេះ គឺមិនមែនក្រុមធំនោះទេ ដោយពួកគេប្រើក្រុម U23 ប៉ុណ្ណោះ។ ការប្រើក្រុម U23 នេះ គឺដោយសារតែលោក Klopp តាំងពីចុងឆ្នាំ២០១៩ឯណោះ លោកបានសន្យាថានឹងឱ្យក្រុមធំសម្រាកនៅដើមខែកុម្ភៈនេះ ដោយកាលនោះគ្មានការលេងជើងទី២ FA Cup នេះទេ។ ដើម្បីជាការរក្សាសន្យា ទើបលោកមិនព្រមដឹកនាំក្រុមដើម្បីលេងទល់ក្រុម Shrewsbury ឡើយ ដោយសុខចិត្តឱ្យកីឡាករសម្រាកតាមកាលកំណត់៕ប្រភព៖ Dailymail