លោក Enrique Cerezo ប្រធានក្លឹប Atletico Madrid បានផ្ដល់ទំនុកចិត្ត១០០%លើការដឹកនាំរបស់លោក Simeone បើទោះជា២ប្រកួតចុងក្រោយប៉ះក្រុមខ្សោយតែលេងមិនល្អក៏ដោយ។
លោក Simeone ក្ដៅកៅអីក្រោយពីដឹកនាំក្រុម AT Madrid ចាញ់ក្រុមលីគលំដាប់ទី៣ Cultural Leonesa ក្នុងពានរង្វាន់ Copa del Rey និងលេងស្មើក្រុម Leganes ថែមទៀតនៅ La Liga ។ តែទោះជាយ៉ាងនេះក្ដី លោក Cerezo ដែលជាប្រធានក្លឹបបានបញ្ជាក់ថាថ្នាក់លើនៅតែមានទំនុកចិត្តលើអ្នកចាត់ការសញ្ជាតិអាហ្សង់ទីននេះដដែល។
បុរសដែលជាម្ចាស់ក្លឹបខាងលើបាននិយាយដូច្នេះថា៖ “ការរិះគន់ហាក់ដូចជាមិនយុត្តិធម៌សោះសម្រាប់ខ្ញុំ។ គាត់ជាគ្រូបង្វឹកដែលផ្ដល់ឱ្យក្រុមបានយ៉ាងច្រើន។ គ្មានក្លឹបណាផ្ដល់ឱកាសដល់គ្រូបង្វឹកបានច្រើនឆ្នាំដូចយើងនោះទេនៅអេស្ប៉ាញ។ យើងមិនសង្ស័យគាត់ឡើយ យើងនឹងផ្ដល់ទំនុកចិត្តឱ្យគាត់កាន់តែខ្លាំងថែមទៀត”។
Diego Simeone វ័យ៤៩ឆ្នាំដឹកនាំក្រុម AT Madrid រយៈពេល៨ឆ្នាំមកហើយ។ លោកបានជួយក្រុមនេះឈ្នះ La Liga ១ដង Copa del Rey ១ដង UEFA Europa League ២ដង និង UEFA Super Cup ១ដង៕ប្រភប៖ Dailymail
