នៅថ្ងៃព្រហស្បតិ៍ទី ២៣ មករានេះ ក្លឹប Unionistas នឹងត្រូវប៉ះគ្នាជាមួយក្លឹប Real Madrid នៅជំនួបវគ្គ ៣២ ក្រុម ពានរង្វាន់ Copa del Rey (មានផ្សាយផ្ទាល់លើ CTS Sports)។
កីឡាករសំខាន់ Karim Benzema នឹងត្រលប់មកចូលរួមវិញ បន្ទាប់ពីរូបគេបានលេចមុខនៅទីលានហ្វឹកហាត់ថ្មីៗនេះ។ ៣ ប្រកួតសំខាន់ៗកន្លងទៅរួមបញ្ចូលទាំងនៅ Spanish Super Cup វគ្គផ្តាច់ព្រ័ត្រ ក៏ Benzema បានខកខានផងដែរ។
មិនត្រឹមតែ Benzema ប៉ុណ្ណោះទេ រួមបញ្ចូលទាំង James Rodriguez ក៏ដូចជា Gareth Bale ទំនងនឹងត្រូវកោះហៅមកចូលរួមដូចគ្នា លើកលែងតែ Sergio Ramos ដែលជួបបញ្ហារបួសកជើងប្រហែលមិនទាន់អាចចូលរួមឡើយ។
យ៉ាងយូរត្រឹមរយៈពេលប៉ុន្មានសប្តាហ៍ទៀតប៉ុណ្ណោះ ប្រសិនមិនបន្តមានបញ្ហារបួស នោះសមាសភាពពេញជើងទាំងអស់មិនថាតែ Marco Asensio, Eden Hazard, Sergio Ramos, Gareth Bale, Karim Benzema និង James Rodriguez ជាដើម ត្រូវវិលត្រលប់មកវិញជាធម្មតា៕ ប្រភព៖ Football-Espana