ខ្សែការពារសុខ សុវណ្ណបានបន្តកុងត្រាជាមួយភ្នំពេញក្រោនជាអចិន្រ្តៃយ៍ហើយសម្រាប់រដូវកាលនេះ បន្ទាប់ពីចាកចេញពីក្លិបវិសាខាក្នុងលក្ខខណ្ឌខ្ចីជើងកាលពីរដូវកាលមុននាជុំទី២ក្នុងពានរង្វាន់ Metfone Cambodian League ។
សុខ សុវណ្ណបាននិយាយក្នុងវេបសាយរបស់ក្លិបអំពីការប្រកួតប្រជែងក្នុងលីគនិងហើយត្រៀមខ្លួនរួចជាស្រេចសម្រាប់ការប្រជែងយកកៅអី១១នាក់ដំបូងនារដូវកាលថ្មីដែលគ្រោងនឹងចាប់ផ្តើមនាថ្ងៃទី១៥ ខែកុម្ភៈថា៖«ខ្ញុំបានព្រមព្រៀងជាអចិន្ត្រៃយ៍ដើម្បីស្នាក់នៅ ភ្នំពេញក្រោន ស្របពេលខ្ញុំមានអារម្មណ៍សប្បាយរីករាយនៅទីនេះ។ ខ្ញុំគិតថាវាដូចជាគ្រួសារទី២ របស់ខ្ញុំ»។
រូបគេបានបន្តទៀតថា៖«ខ្ញុំមិនច្បាស់ទេថាខ្ញុំនឹងទទួលបានកៅអី១១នាក់ដំបូងរហូតនោះ ព្រោះនឹងមានប្រកួតជាច្រើនត្រូវលេង ដូច្នេះយើងត្រូវតែធ្វើការឆ្លាស់កីឡាករ។ ខ្ញុំត្រូវប្រឹងប្រែងហ្វឹកហាត់ដើម្បីបង្ហាញពីគុណភាពរបស់ខ្ញុំដើម្បីធ្វើឱ្យគ្រូបង្វឹកលោក វណ្ណា ទុកចិត្តខ្ញុំ»។ ខ្សែការពារកណ្តាលរូបនេះបានបន្ថែមទៀតថា៖ «ខ្ញុំជឿជាក់លើគ្រូបង្វឹក ហើយខ្ញុំគិតថាគាត់អាចដោះស្រាយបញ្ហាដែលយើងមានពីរដូវកាលមុន ដូច្នេះខ្ញុំសង្ឃឹមថាយើងអាចប្រជែងដណ្តើមជើងឯកលីគរដូវកាលនេះបាន។
ខ្សែការពារវ័យ២៧ឆ្នាំរូបនេះ បង្ហាញខ្លូនបាន១៣លើកសម្រាប់ ភ្នំពេញក្រោន កាលពីរដូវកាលមុន ដោយបានជួយក្លិបឡើងវគ្គពាក់កណ្ដាលផ្ដាច់ព្រ័ត្រពានរង្វាន់ Hun Sen Cup 2019 ៕
ប្រភព៖ភ្នំពេញក្រោន