អ្នកចាត់ការថ្មីលោក Quique Setien បានជ្រើសរើសកីឡាករធ្លាប់លេងឲ្យឈុត B របស់ Barcelona គឺខ្សែបម្រើ Riqui Puig ចូលលេងនៅនាទី ៧១ ជំនួស Ivan Rakitic នៅប្រកួតទល់ Granada កាលពីយប់មិញ។
នេះជាលើកដំបូងសម្រាប់យុវជនវ័យ ២០ ឆ្នាំក្នុងការចូលរួមជាមួយឈុតធំ ហើយក្រោយគេផ្លាស់ចូលបាន ៥ នាទី គ្រាប់បាល់សម្រេចដោយថ្វីជើងរបស់ Lionel Messi ក៏បានកើតឡើងនៅនាទី ៧៦។
ថ្លែងប្រាប់ Barca TV យុវជនលេងតំបន់បម្រើនិយាយថា៖ “បរិយាកាសគឺពិតជាខុសគ្នាដាច់បើធៀបនឹងខ្ញុំលេងនៅពានរង្វាន់រង្វាន់ Gamper ដោយខ្ញុំពិតជាចង់អរគុណទៅកាន់ Setien ដែលលោកបានផ្តល់ឱកាសសម្រាប់ខ្ញុំ”។
យុវជនរូបនេះបន្តថា៖ “យើងស្ថិតក្នុងពេលវេលាដ៏តានតឹងទល់ Granada ហើយពេល Setien ផ្តល់ឱកាសឲ្យខ្ញុំចូលរួមការប្រកួត ខ្ញុំក៏មានឱកាសទទួលបានបាល់ខ្លះ ហើយ Messi ក៏ស៊ុតបញ្ចូលទីយ៉ាងល្អ”។
“ខ្ញុំនឹងនៅតែបន្តខិតខំដើម្បីទទួលបានឱកាសនេះថែមទៀត ហើយប្រសិនខ្ញុំធ្លាក់ឈ្មោះទៅឈុត B វិញ ក៏ខ្ញុំនឹងខំប្រឹងដើម្បីឲ្យ Setien មើលឃើញហើយហៅខ្ញុំមកលេងឈុតធំទៀតដែរ”៕ ប្រភព៖ AF