Andreas Granqvist ប្រធានក្រុមបាល់ទាត់ជម្រើសជាតិស៊ុយអែត បានបញ្ជាក់ថាប្រពន្ធរបស់ខ្លួនរឹងមាំនិងយល់ច្បាស់ពីការងាររបស់ខ្លួនធ្វើដើម្បីជាតិ។ ដូច្នេះ នាងអាចបង្កើតកូនដ៏ល្អមួយឱ្យគេបាន បើទោះជាគេមិនបាននៅជាមួយក៏ដោយ។
ប្រពន្ធរបស់ Andreas ឆ្លងទន្លេនៅថ្ងៃអង្គារកន្លងទៅ ដោយមិនមានវត្តមានរបស់ស្វាមីនៅជាមួយឡើយ។ យ៉ាងណាមិញ កីឡាករខាងលើបានបញ្ជាក់ថាខ្លួនមិនសោកស្ដាយដែលមិនបាននៅជាមួយប្រពន្ធគ្រាដែលនាងឆ្លងទន្លេឡើយ ព្រោះសូម្បីតែនាងផ្ទាល់ក៏យល់ពីអ្វីដែលកីឡាករអាជីពដូចជាលោកត្រូវធ្វើឱ្យជម្រើសជាតិរបស់ខ្លួនដែរ។
“ខ្ញុំបានសម្រេចចិត្តនៅទីនេះ ដើម្បីស៊ុយអែត។ ប្រពន្ធរបស់ខ្ញុំគាត់ជាមនុស្សរឹងមាំ ហើយយើងបានដឹងពីគ្នាច្បាស់ និងនិយាយគ្នាតាំងពីខ្ញុំសម្រេចចិត្តមកលេង World Cup នេះម្ល៉េះ។ ដូច្នេះគ្មានអ្វីកើតឡើងឡើយ។ ខ្ញុំមិនអាចអវត្តមានក្នុងវគ្គ៨ក្រុមចុងក្រោយប៉ះជាមួយអង់គ្លេសដាច់ខាត”។ សម្ដីរបស់កីឡាករវ័យ៣៣ឆ្នាំខាងលើ។
ស៊ុយអែត គ្មានកីឡាករល្បីឈ្មោះលេងនៅក្លឹបធំៗដូចក្រុមដទៃច្រើនទេ ប៉ុន្តែពួកគេលេងសហការគ្នាបានយ៉ាងល្អ ហើយសឹងតែគ្មាននរណាជឿថាពួកគេអាចឡើងដល់វគ្គ៨ក្រុមចុងក្រោយនេះបានទេ។ យ៉ាងណាមិញ ពួកគេបានធ្វើការងារនេះសម្រេចហើយ នៅឡើយប៉ះអង់គ្លេសទៀត ថាតើអាចឈានដល់វគ្គ៤ក្រុមចុងក្រោយឬអត់? ប្រភព៖ DailyMail
