ក្រុមបាល់ទាត់ក្រោមអាយុ២៣ឆ្នាំរបស់ជម្រើសជាតិថៃ បានឡើងទៅវគ្គ៨ក្រុមចុងក្រោយហើយ ក្រោយពីលេងស្មើក្រុមអ៊ីរ៉ាក់ ១-១ កាលពីយប់មិញនេះ។
ក្រុមថៃ ជាម្ចាស់នៃការប្រកួតពានរង្វាន់នេះ។ ពួកគេបានបង្ហាញទម្រង់លេងប្លែកនិងល្អខ្លាំងមែនទែន ក្រោមការដឹកនាំរបស់លោកគ្រូជប៉ុន Nishino ។ ដោយបើកឆាកក្រុមថៃ បានយកឈ្នះលើបារ៉ែនដល់ទៅ ៥-០ ដែលជាជ័យជម្នះធំជាប្រវត្តិសាស្ត្រក្នុងបាល់ទាត់ថៃនៃព្រឹត្តិការណ៍នេះតែម្ដង។ ដោយឡែកប្រកួតទី២វិញ ពួកគេចាញ់ក្រុមខ្លាំងអូស្ត្រាលី ក្នុងលទ្ធផល ២-១ និងប្រកួតចុងក្រោយយប់មិញ ស្មើក្រុមអ៊ីរ៉ាក់ ១-១។ លទ្ធផលនេះ ក្រុមថៃស្ថិតនៅលេខ២ក្នុងពូល ទទួលបានឱកាសឡើងទៅវគ្គ៨ក្រុមចុងក្រោយដូចក្ដីប្រាថ្នាហើយ។
លោក Nishino គ្រូបង្វឹកក្រុមជម្រើសជាតិថៃ បានបញ្ជាក់ថាដំបូងលោកចង់ឈ្នះការប្រកួតនេះ ប៉ុន្តែបានលទ្ធផលស្មើក៏អាចទទួលយកបានដែរ ព្រោះវាបានធ្វើឱ្យក្រុមឡើងទៅវគ្គបន្ដបាន។ លោកនៅតែមានជំនឿចិត្តថា ក្រុម U23 ថៃ នឹងអាចឡើងដល់វគ្គ៤ក្រុមចុងក្រោយ ហើយទទួលបានកៅអីទៅលេងនៅ អូឡាំពិកឆ្នាំ ២០២០ នៅប្រទេសជប៉ុនបាន៕ប្រភព៖ Siamsport