ក្លឹប Paris Saint-Germain បានប្រកាសជាផ្លូវការនៅកិច្ចព្រមព្រៀងបន្តកុងត្រាថ្មីរយៈពេល ៤ ឆ្នាំកន្លះជាមួយនឹងខ្សែការពារ Marquinhos (បន្ថែម ២ ឆ្នាំលើកុងត្រាចាស់) ពោលគឺត្រូវឈរជើងឲ្យក្លឹបដល់ឆ្នាំ ២០២៤។
Marquinhos គឺជាបេក្ខភាពដ៏សំខាន់មួយរូបនៅប្រព័ន្ធការពារក្រោយជាមួយនឹង Thiago Silva ដែលជាទូទៅក្លឹបហាក់ពេញចិត្តកីឡាករពីររូបនេះខ្លាំងបំផុត។ រូបគេបានផ្លាស់ចេញពី Roma នៅខែតុលា ឆ្នាំ ២០១៣ ដោយឆ្លងកាត់អស់ជាច្រើនឆ្នាំ ក៏បានជួយឲ្យ PSG លើកពាន Ligue 1 ៤ លើកផងដែរ។
Marquinhos បាននិយាយនៅសន្និសីទសារព័ត៌មានយ៉ាងដូច្នោះថា៖ “ទាំងប្រជាជននៅទីក្រុងប៉ារីសនិងក្លឹប PSG ទាំងមូលគឺពិតជាចង់ឲ្យខ្ញុំបន្តនៅទីនេះ និងបន្តកុងត្រារបស់ខ្ញុំ ហើយវាក៏នៅតែជាមហិច្ឆតារបស់ក្លឹបដែលចង់បង្កើតប្រវត្តិសាស្រ្តដ៏អស្ចារ្យជាច្រើនបន្ថែម”។
“ខ្ញុំមានអារម្មណ៍ថាដូចជានៅផ្ទះរបស់ខ្លួនឯងអ៊ីចឹង ដោយទទួលបានគ្រប់យ៉ាងទាំងអស់ បែបនេះហើយទើបខ្ញុំសម្រេចចិត្តលឿនអ៊ីចឹង”៕ ប្រភព៖ FoxSportAsia