លោក Simeone អ្នកចាត់ការក្រុម Atletico Madrid សរសើរដល់ខ្សែបម្រើ Valverde ជាកីឡាករឆ្លាត យល់កាលៈទេសៈបានល្អ ចំពោះការឈូសយកកាតក្រហមកាលពីយប់មិញ។
ក្រុម Real Madrid លើកបាន Super Cup ហើយ ក្រោយពីបានយកឈ្នះលើក្រុម Atletico Madrid ដោយបាល់កាត់សេចក្ដី១១ម៉ែត្រ ៤-១ ក្រោយពីលេងស្មើគ្នានៅម៉ោងប្រកួត៩០នាទីនិងថែម១៥នាទី២ដងទៀតក៏នៅតែស្មើ។ ក្នុងការប្រកួត Valverde ដែលបានកាតក្រហមដោយសារតែឈូស Morata សង្គ្រោះបាល់គ្រោះថ្នាក់ឱ្យ Real Madrid ទទួលបានពានរង្វាន់ Man of The Match ។ ខ្សែបម្រើរូបនេះ ទទួលបានការសរសើរច្រើន ចំពោះការសម្រេចចិត្តត្រូវរបស់គេ ដែលអាចជួយក្រុមអធិរាជសទទួលបានជោគជ័យ។
ដោយសូម្បីតែ Simeone ដែលជាអ្នកចាត់ការក្រុម AT Madrid ក៏មិនអាចមិនសរសើររូបគេបានដែរ។ អ្នកចាត់ការសញ្ជាតិអាហ្សង់ទីនបានបញ្ជាក់ថា៖ “គាត់អាចយល់ច្បាស់ពីការប្រកួត។ គាត់ដឹងពីអ្វីដែលត្រូវធ្វើ គាត់ជាមនុស្សឆ្លាត។ ក្រុមដែលមានកីឡាករយល់ច្បាស់យ៉ាងនេះ គឺពិតជាជោគជ័យមិនខាន”៕ប្រភព៖ Dailymail
