ក្រុម Real Madrid នឹងត្រូវតតាំងជាមួយក្រុម Atletico Madrid នៅម៉ោង១រំលងអាធ្រាត្រនេះ ក្នុងវគ្គផ្ដាច់ព្រ័ត្រពានរង្វាន់ Super Cup ។មុនឡើងមកដល់វគ្គនេះ ក្រុម Real Madrid បានយកឈ្នះលើក្រុម Valencia ក្នុងលទ្ធផល ៣-១ ស្របពេលក្រុម AT Madrid វិញ យកឈ្នះក្រុម Barcelona ក្នុងលទ្ធផល ៣-២។ ការប្រកួត Madrid Derby នេះ នឹងស្វិតស្វាញខ្លាំងមិនខាន ត្បិតអីក្រុមរបស់លោក Zidane នេះ ប៉ះក្រុម Simeone ច្រើនលើកមកហើយ ជាពិសេសនៅវគ្គផ្ដាច់ព្រ័ត្រ UEFA Champions League តែម្ដង។
លោក Zidane អ្នកចាត់ការក្រុម Real Madrid បាននិយាយថា៖ “ខ្ញុំសប្បាយចិត្តក្នុងការលេងវគ្គផ្ដាច់ព្រ័ត្រ។ Real Madrid រស់ដើម្បីការប្រកួតវគ្គនេះ ហើយយើងធ្វើវាបានសម្រេចហើយ។ វាមិនមានសម្ពាធអ្វីខ្លះ ជាងការប្រកួតផ្ដាច់ព្រ័ត្រដទៃទៀតទេ ប៉ុន្ដែយើងមកទីនេះដើម្បីឈ្នះពានរង្វាន់”។សម្រាប់លោក Simeone អ្នកចាត់ការក្រុម AT Madrid វិញក៏និយាយមុនការប្រកួតដែរថា៖ “យើងដឹងពីក្រុម Real Madrid ច្បាស់ ពួកគេជាក្រុមខ្លាំងមួយ ព្រោះកីឡាករម្នាក់ៗសុទ្ធតែមានសមត្ថភាពខ្ពស់ ព្រោះពួកគេមានគ្រូបង្វឹកដែលមានតែពាក្យថាឈ្នះ។ សម្រាប់យើងវិញ ការប្រកួតនេះនឹងតានតឹង ប៉ុន្តែពេលខ្ញុំឃើញកីឡាករខ្ញុំធ្វើបានល្អពេលប៉ះក្រុម Barcelona ខ្ញុំលែងខ្លាចក្រុមណាដទៃទៀតហើយ”៕
ប្រភព៖ Marca
