Thomas Meunier ខ្សែការពារក្រុមជម្រើសជាតិបែលហ្សិក ថាខ្លួនមិនទាន់រកឃើញវិធីដើម្បីបិទ កីឡាករ Neymar របស់ប្រេស៊ីលបាននោះទេ។
បែលហ្សិក ត្រូវតតាំងជាមួយក្រុមប្រេស៊ីល នៅវគ្គ៨ក្រុមចុងក្រោយពានរង្វាន់ FIFA World Cup 2018 នៅប្រទេសរុស្ស៊ី។ ក្រុមទាំងពីរខាងលើនេះ សុទ្ធតែខ្លាំងដូចគ្នា ហើយកីឡាករក៏ល្អរៀងខ្លួន លេងនៅក្លឹបធំៗ ទាំងអស់។ តួយ៉ាងដូចជា Thomas គឺជាខ្សែការពារបែលហ្សិកដែលលេងនៅ PSG ជាមួយកីឡាករ Neymar របស់ប្រេស៊ីលដែរ។
ត្បិតតែលេងជាមួយគ្នាមែន ប៉ុន្តែខ្សែការពារវ័យ២៦ឆ្នាំខាងលើ និយាយថាខ្លួនមិនទាន់មានវិធីដើម្បីបិទមិត្តរួមក្រុមអាជីពជាមួយគ្នានៅឡើយទេ។ “ខ្ញុំមិនដឹងវិធីដើម្បីបញ្ចប់គាត់នោះទេ។ គាត់ជាកីឡាករម្នាក់ដែលមិនអាចព្យាករណ៍បានមុន ថាគាត់នឹងលេងរបៀបមិច។ Neymar ប្រហែលជាកីឡាករល្អបំផុតម្នាក់ដែលខ្ញុំធ្លាប់ជួប។ យ៉ាងណាក្ដី ខ្ញុំនឹងប្រឹងប្រែងឱ្យអស់ពីសមត្ថភាព”។
ប្រេស៊ីល និងបែលហ្សិក មានកំណត់ត្រាល្អដូចគ្នា ដោយ៥ប្រកួតចុងក្រោយ ពួកគេមិនដែលចាញ់នោះទេ។ ដូច្នេះ មានតែចាំមើលការប្រកួតរវាងក្រុមទាំងពីរនៅថ្ងៃទី៧ខាងមុខនេះហើយ ថាតើក្រុមណាមួយអាចឡើងវគ្គបន្ដ និងក្រុមណាត្រូវហាលអាវត្រលប់ទៅផ្ទះវិញ៕ប្រភព៖ DailyMail