សមាជិកក្រុម Barcelona រហូតដល់៨០% បានបោះឆ្នោតចង់ឃើញលោក Valverde ចាកចេញពីតំណែងនៅចប់រដូវកាលនេះ បើទោះជាបច្ចុប្បន្នក្រុមកំពុងឈរកំពូលតារាង La Liga ក៏ដោយ។លោក Valverde មានកុងត្រាដឹកនាំក្រុម Barcelona ដល់ឆ្នាំ២០២១។ ប៉ុន្តែបើតាមការស្រង់មតិរបស់សមាជិកក្រុមអ្នកមានបុណ្យនេះវិញ បានបង្ហាញឱ្យឃើញថាមានរហូតដល់៨០%ឯណោះនៃសមាជិកសរុបចង់ឃើញអ្នកចាត់ការរូបនេះ ចាកចេញពីតំណែងនៅត្រឹមរដូវកាលនេះឯង។ ការមិនពេញរបស់សមាជិកនេះ កើនឡើងខ្លាំង ក្រោយពីលោកមិនអាចដឹកនាំក្រុម Barcelona ឱ្យជោគជ័យនៅពានរង្វាន់ UEFA Champions League បាន។២រដូវកាលកន្លងមកនេះ ក្រុម Barcelona ក្រោមការដឹកនាំរបស់លោក Valverde ធ្វើបានល្អនៅពានក្នុងស្រុក ប៉ុន្តែនៅ UEFA Champions League វិញ ពួកគេលេងមិនបានល្អឡើយ។ ជាក់ស្ដែង ការភ្លាត់ចាញ់ក្រុម Roma និង Liverpool នាឆ្នាំកន្លងទៅនេះ បានធ្វើឱ្យក្រុម Barcelona បាក់មុខជាខ្លាំង ព្រោះ២ប្រកួតនេះ ពួកគេឈ្នះក្នុងដីច្រើនគ្រាប់ហើយ តែបែរជាភ្លាត់ក្រៅដីទៅវិញ។និយាយពី៨០%នៃសមាជិកដែលចង់ឱ្យលោក Valverde ចាកចេញនោះ ពួកគេចង់ឃើញក្លឹបនាំយកលោក Klopp មកដឹកនាំក្រុមម្ដង។ អ្នកចាត់ការសញ្ជាតិអាល្លឺម៉ង់នេះ កំពុងជោគជ័យខ្លាំងនៅក្លឹប Liverpool ដូច្នេះហើយ ពួកគេគិតថាប្រសិនបើបានមកដឹកនាំក្រុមអ្នកមានបុណ្យវិញ នោះនឹងកាន់តែជោគជ័យខ្លាំងថែមទៀត៕
ប្រភព៖ Marca