លោក Pep Guardiola បានបញ្ជាក់ថាការប្រជែងពានរង្វាន់ English Premier League របស់ក្រុម Manchester City បានបញ្ចប់ហើយ នៅឡើយតែពាន UEFA Champions League ប៉ុណ្ណោះ។ក្រុម Man City ចាញ់ពិន្ទុក្រុមកំពូលតារាង Liverpool ដល់ទៅ១៤ពិន្ទុ។ គម្លាតនេះ ធ្វើឱ្យលោក Pep យល់ឃើញថាឱកាសការពារតំណែងជើងឯករបស់លោក អស់បាត់ទៅហើយ បើទោះជាបច្ចុប្បន្នទើបពាក់កណ្ដាលរដូវកាលក៏ដោយ។ នាឆ្នាំនេះ កត្តាធំដែលធ្វើឱ្យក្រុម Man City មិនជោគជ័យ គឺបញ្ហាកីឡាករសំខាន់របួស ខណៈដែលអ្នកជំនួសវិញ មិនអាចបំពេញតាមតម្រូវការបាន។
អស់ពានរង្វាន់ក្នុងស្រុកមែន ប៉ុន្តែក្រុម Man City នៅសល់ពានរង្វាន់សំខាន់មួយទៀតគឺ UEFA Champions League ដែលក្លឹបនេះមិនធ្លាប់ឈ្នះសោះ។ លោក Pep បានដាក់គោលដៅយកពាននេះ តាំងពីលោកចូលដឹកនាំ ប៉ុន្តែមិនបានសម្រេចឡើយ។ ខណៈដែលរដូវកាលនេះវិញ នៅវគ្គ១៦ក្រុមចុងក្រោយ ពួកគេត្រូវតតាំងជាមួយក្រុម Real Madrid ទៀត៕
ប្រភព៖ DailyMail