លោក Jurgen Klopp បានបញ្ជាក់ថាខ្សែប្រយុទ្ធ Adama Traore របស់ Wolves មានទេពកោសល្យល្អណាស់ ហើយនឹងក្លាយជាខ្សែប្រយុទ្ធមួយរូបមុតស្រួចខ្លាំងមិនខាន បើទទួលបានការបង្ហាត់ល្អពីគ្រូបង្វឹក។
Adama Traore ជាយុវជនរបស់ក្រុម Barcelona ហើយក៏ធ្លាប់មានឈ្មោះក្នុងបញ្ជីឈុតដែរ ប៉ុន្តែមិនបានចូលលេងនោះទេ។ រូបគេបានផ្លាស់ទៅលេងនៅក្លឹប Aston Villa នៅឆ្នាំ២០១៥ បង្ហាញខ្លួនបាន១២ប្រកួត មុនពេលផ្លាស់ទៅលេងនៅ Middlesbrough ។ កីឡាករវ័យ២៣ឆ្នាំនេះ ត្រូវបានលោក Nuno មើលឃើញពីសមត្ថភាព ហើយក៏សម្រេចចិត្តទិញមករួមក្រុម Wolves នៅឆ្នាំ២០១៨ក្នុងតម្លៃខ្លួន១៨លានផោន។
ក្រោមការណែនាំរបស់លោក Nuno នេះហើយ ទើប Traore លេងបានយ៉ាងល្អ មិនត្រឹមតែអាចជួយក្រុមឱ្យឈ្នះ Manchester City នោះទេ។ កីឡាករមាឌធំនេះ តែងតែជួយក្រុមបានច្រើនមែនទែន។ លោក Klopp អ្នកចាត់ការក្រុម Liverpool ក៏បានឃើញពីសមត្ថភាពរបស់កីឡាករអេស្ប៉ាញនេះដែរ។
មុនប៉ះក្រុម Wolves នៅរាត្រីនេះ លោក Klopp អ្នកចាត់ការក្រុម Liverpool បានអះអាងថា៖ “Vardy ជាខ្សែប្រយុទ្ធដែលពិបាកបិទ ប៉ុន្តែសម្រាប់ Traore កាន់តែពិបាកថែមទៀត។ គាត់ពិតជាមានទេពកោសល្យល្អ ទាំងកាយសម្បទា និងបច្ចេកទេស។ ថ្ងៃណាមួយគេនឹងក្លាយជាកំពូលខ្សែប្រយុទ្ធមិនខាន”៕ប្រភព៖ Dailymail
