AFC Cup: ប្រភពគណៈកម្មការរៀបចំការប្រកួតបាល់ទាត់កម្ពុជាបានឲ្យដឹងថា ក្លិបព្រះខ័នរាជស្វាយរៀងនឹងប្រើប្រាស់ពហុកីឡដ្ឋានជាតិអូឡាំពិកកម្ពុជាជាទីតាំងសម្រាប់ក្នុងការប្រកួតជម្រុះ AFC Cup រដូវកាល២០២០ នៅខែមករា ខាងមុខ ខណៈដែលក្លិបជើងឯកលីគកំពូលកម្ពុជារដូវកាល២០១៩មួយនេះត្រូវទទួលក្រុម Master 7 ដែលជាក្រុមជើងឯកលីគកំពូលឡាវ។
តាមពិតទៅ!ព្រះខ័នរាជស្វាយរៀងមានកីឡដ្ខានរបស់ខ្លួនដែលពោលគឺកីឡដ្ឋានស្វាយរៀងមានមូលដ្ឋានក្នុងទីរួមក្រុមខេត្តស្វាយរៀង ប៉ុន្តែកីឡដ្ឋានមួយនេះមិនទាន់ត្រូវតាមស្ដង់ដាររបស់ AFC ក្លិបបានសម្រេចមកប្រើប្រាស់ពហុកីឡដ្ឋានជាតិវិញ។ ក្នុងពានរង្វាន់ AFC Cup នាពេលកន្លងមកក្លិបបឹងកេត និងណាហ្គាវើលដ៍ក៏ប្រើប្រាស់សម្រាប់ការប្រកួតរៀងៗខ្លួនតាំងពីវគ្គជម្រុះដល់វគ្គចែកពូល។
បញ្ជាក់ឡើងវិញថាពេលនេះស្វាយរៀងមិនមានកៅអីវគ្គចែកពូល AFC Cup នោះទេ តែក្លិបចាំបាច់ត្រូវបំពេញភារកិច្ចនៅវគ្គ Play-Off ជាមុនសិនដែលប្រព្រឹត្តទៅនៅថ្ងៃពុធ ទី២២ ខែមករា សម្រាប់ជើងទីមួយ និងជើងទីពីរនៅរដ្ឋធានីវៀងចន្ទន៍ មួយសប្ដាហ៍បន្ទាប់។
ក្រុមឈ្នះក្នុងចំណោមភាគីទាំងពីរនឹងឆ្លងចូលពូល G ដែលមាន Ceres Negros របស់ហ្វីលីពីន, ក្រុមវៀតណាម Than Quang Ninh និងក្លិបឥណ្ឌូនេស៊ី Bali United កំពុងរង់ចាំស្រាប់៕