លោក Carlo Ancelotti បានយល់ព្រមមកដឹកនាំក្រុម Everton ហើយ ដោយរង់ចាំតែក្លឹបប្រកាសជាផ្លូវការប៉ុណ្ណោះ ក្រោយពីចរចាគ្នាត្រូវ។
Ancelotti ត្រូវបានក្លឹប Napoli ដកតំណែង ក្រោយពីដឹកនាំក្រុមឈ្នះ Genk ៤-០ បានកៅអីវគ្គ១៦ក្រុមចុងក្រោយ។ បន្ទាប់ពីត្រូវក្លឹបនៅអ៊ីតាលីដកភ្លាម ក្រុម Everton បានចាប់ផ្ដើមទាក់ទងភ្លែត ព្រោះថាពួកគេក៏ទើបដកអ្នកចាត់ការក្រុម Silva ចេញដូចគ្នា។ ប្រភពនៅអង់គ្លេស បានបញ្ជាក់ថាការទាក់ទងនោះ បានសម្រេចទៅហើយ នៅឡើយតែចាំការប្រកាសមកដឹកនាំជាផ្លូវការប៉ុណ្ណោះ។
លោក Duncan Ferguson ដែលជាគ្រូបង្វឹកបណ្ដោះអាសន្នរបស់ក្រុម Everton ក៏បញ្ជាក់ដែរថាលោកពេញចិត្តចំពោះវត្តមានរបស់លោក Ancelotti ។ បើទោះជាអ្នកចាត់ការសញ្ជាតិអ៊ីតាលីនេះមកដឹកនាំក្រុមមែន ក៏លោកនៅតែបន្ដជួយនិងធ្វើជាគ្រូជំនួយក្រុមនេះទៀតដែរ៕ប្រភព៖ Dailymail
