ថៃ នឹងធ្វើជាម្ចាស់ផ្ទះការប្រកួតពានរង្វាន់ AFC U23 Championship នាខែមករាឆ្នាំ២០២០ខាងមុខនេះ ខណៈដែលក្រុមម្ចាស់ផ្ទះមួយនេះនៅមិនទាន់រកឃើញជម្រើសកីឡាករល្អនៅឡើយទេ។
លោក Nishino គ្រូបង្វឹកក្រុមថៃ បានបញ្ជាក់ថាលោកនឹងធ្វើការកោះហៅកីឡាករបន្ថែម ដើម្បីបោះជំរុំហ្វឹកហាត់នៅថ្ងៃទី២៦ខែធ្នូនេះ។ ស្របពេលកីឡាករដែលមានឈ្មោះកាលនៅស៊ីហ្គេមកន្លងទៅ មិនអាចធានាកៅអីរបស់ខ្លួនបានឡើយ។ ការមិនប្រញាប់ក្នុងការប្រមូលផ្ដុំនេះ គឺគ្រូបង្វឹកសញ្ជាតិជប៉ុនបញ្ជាក់ថាលោកចង់ឱ្យកីឡាករសម្រាក ប្រមូលអារម្មណ៍ឱ្យបានល្អ ក្រោយពីបរាជ័យនៅប្រទេសហ្វីលីពីន។
អតីតគ្រូបង្វឹកក្រុមជម្រើសជាតិជប៉ុន បានបន្ថែមថា៖ “យើងនៅមានកន្លែងច្រើនទៀត ដែលត្រូវពង្រឹងបន្ថែម។ យើងនឹងត្រូវបន្ថែមសមាសភាពកីឡាករថ្មីមករួមក្រុម ហើយបញ្ជីឈ្មោះនឹងចេញនៅពេលខាងមុខនេះ។ ក្នុងនាមជាម្ចាស់ផ្ទះ យើងសង្ឃឹមថាអ្នកគាំទ្រនឹងក្លាយជាកម្លាំងចិត្តធំមួយសម្រាប់ក្រុមក្នុងការប្រកួតនេះ”។
ការប្រកួត AFC U23 Championship នាពេលខាងមុខនេះ ថៃស្ថិតនៅពូលជាមួយក្រុម U23 បារ៉ែន អូស្ត្រាលី និងអ៊ីរ៉ាក់។ ការប្រកួតនេះ ក្រុមចំណាត់ថ្នាក់ពីលេខ១ដល់លេខ៣ នឹងមានឱកាសបានទៅលេងព្រឹត្តិការណ៍អូឡាំពិក២០២០ នៅប្រទេសជប៉ុន៕ប្រភព៖ Bangkokpost