ការប្រកួតវគ្គ ១៦ ក្រុម UEFA Champions League នឹងធ្វើឡើងអំឡុងពាក់កណ្តាលខែកុម្ភៈ ប៉ុន្តែការចាប់ឆ្នោតក៏នឹងឈានចូលមកដល់នាថ្ងៃចន្ទសប្តាហ៍ក្រោយនេះ។
មុនឈានដល់ការប្រកាសលទ្ធផលចាប់ឆ្នោត អ្នកចាត់ការលោក Jose Mourinho បាននិយាយទុកជាមុនថាក្រុមរបស់លោកគឺជាក្រុមដែលគួរឲ្យខ្លាចបំផុត សម្រាប់ក្រុមដែលឈរលេខ ២ ទាំងអស់ ហើយវាក៏ជារឿងដែលក្រុមឈរលេខ ១ ក្នុងពូល ត្រូវព្រួយបារម្ភដែលមានដូចជា Barcelona, Juventus, PSG និង Valencia ជាដើម។
លោក Mourinho ថ្លែងក្រោយបរាជ័យក្រោមថ្វីជើង Bayern៖ “ក្រុមដែលបានឆ្លងផុតនាមជាក្រុមឈរចំណាត់ថ្នាក់កំពូលនឹងមិនចង់លេងប៉ះក្រុមរបស់យើងនោះទេ ដោយក្រុមឈរលេខ ២ ទាំងអស់ គឺយើងជាក្រុមដ៏រឹងមាំបំផុតមួយ”។
លោកបន្ថែម៖ “នៅថ្ងៃណូអែលខាងមុខខ្ញុំដឹងថាប្រទេសទាំងមូលនឹងមានការសប្បាយរីករាយ ហើយក៏បង្កើតការខកខានខ្លះដល់ក្រុមនិងកីឡាករ ប៉ុន្តែចូលដល់ខែកុម្ភៈខ្ញុំនឹងយល់ពីកីឡាកររបស់ខ្ញុំបានកាន់តែល្អប្រសើរជាងនេះ ហើយពួកគេក៏នឹងយល់ពីខ្ញុំដូចគ្នា បែបនេះនៅខែកុម្ភៈពួកគេនឹងខ្លាចក្រុមរបស់យើងជាមិនខាន”៕ ប្រភព៖ BeSoccer
