លោក Jose Mourinho មិនឱ្យកីឡាករ Spurs មើលវីដេអូ ឬយករឿងដែលចាញ់ក្រុម Bayern Munich ៧-២ មករំលឹក មុនប្រកួតជាថ្មីម្ដងទៀតនៅយប់នេះទេ។
ស្ថិតក្នុងពូលជាមួយគ្នា UEFA Champions League កាលពីជើងទី១កន្លងទៅ ក្រុម Spurs បានបរាជ័យធ្ងន់ក ៧-២ ក្រោមថ្វីជើងរបស់ក្រុម Bayern Munich ។ យ៉ាងណាមិញ នោះជារឿងអតីតកាលប៉ុណ្ណោះ លោក Jose មិនឱ្យកីឡាកររំលឹកវាទៀតនោះទេ ខណៈដែលយប់នេះប៉ះក្រុម Bayern ដដែល ប៉ុន្តែស្ថិតក្រោមការដឹកនាំរបស់អ្នកចាត់ការខុសគ្នា។
“ខ្ញុំបានមើលការប្រកួតនោះច្រើនដងហើយ ដើម្បីវិភាគ។ ខ្ញុំមិនចង់និយាយពី Bayern ទេ ប៉ុន្តែខ្ញុំចង់ឱ្យកីឡាករយើងបំភ្លេចវាចោល ហើយប្រឹងប្រែងលេងតាមរបៀបរបស់យើង។ វាជារឿងល្អ នៅពេលយើងគិតពីក្រុមខ្លួន ជាជាងចំណាយពេលរំលឹករឿងចាស់ ហើយមើលតែពីក្រុមគេដទៃ”។ សម្ដីរបស់ Jose ។
រំលឹកថាប្រកួតរវាងក្រុម Bayern Munich និង Spurs នេះ គ្រាន់តែជាប្រកួតបង្គ្រប់កិច្ចប៉ុណ្ណោះ ព្រោះពួកគេបានឡើងទៅជុំបន្ដដូចគ្នាហើយ។ បើទោះជា Spurs ឈ្នះ ក៏នៅតែលេខ២ដដែលទេ ព្រោះបច្ចុប្បន្នមាន១០ពិន្ទុ ស្របពេល Bayern មាន១៥ពិន្ទុ៕ប្រភព៖ Dailymail
