Ronaldo ប្រាប់​មិត្ត​ចាស់​ត្រង់ៗ​ថា​ខ្លួន​ស្តាយ​ក្រោយ ពេល​មិន​បាន​ឈ្នះ Ballon d’Or

Cristiano Ronaldo បាន​ប្រាប់​ទៅ​កាន់​មិត្ត​ចាស់ៗ​នៅ​ក្លឹប Real Madrid ថា​ខ្លួន​មាន​ភាព​ស្តាយក្រោយ ជុំវិញ​ការ​សម្រេច​ចិត្ត​ចាកចេញ​មក​ចូលរួម​នៅ​ក្លឹប Juventus នា​រដូវ​ក្តៅ​ឆ្នាំ ២០១៨ កន្លង​ទៅ។ នេះ​បើ​តាម​សារព័ត៌មាន ABC របស់​អេស្ប៉ាញ​បាន​ចុះ​ផ្សាយ។

ភាព​សោកសង្រេង​បំផុត​សម្រាប់ CR7 គឺ​ការ​ដែល​មិន​បាន​ឈ្នះ​ពាន​រង្វាន់ Ballon d’Or ឆ្នាំ ២០១៨ និង ២០១៩ ហើយ​គិត​ថា​ប្រសិន​លោក​បន្ត​ឈរ​ជើង​នៅ Real Madrid នោះ​ពាន​ទាំង​ពីរ​ឆ្នាំ​ប្រាកដ​ជា​មាន​សង្ឃឹម​ក្លាយ​ជា​របស់​ខ្លួន។

គួរ​រំឭក​ថា Juventus បាន​ចាយ​លុយ ១១២ លាន​អឺរ៉ូ​ចុះ​ហត្ថលេខា​យក​កីឡាករ​វ័យ ៣៤ ឆ្នាំ​ចេញ​ពី​ក្លឹប Real Madrid ដែល​សាមី​ខ្លួន​និយាយ​នៅ​ពេល​ដំបូង​នោះ ព្រោះ​ចង់​ផ្លាស់​មក​ស្វែងរក​ការ​ប្រកួត​ប្រជែង​ថ្មី ប៉ុន្តែ​តាម​រយៈ​លទ្ធផល​ពីរ​ឆ្នាំ​បាន​ឆ្លង​មក​កាត់​មក​នេះ គឺ​ហាក់​មិន​ទទួល​ផ្លែផ្កា​ជា​ដុំ​កំភួន​អ្វី​ទាល់​តែ​សោះ។

នា​រដូវ​កាល ២០១៨/១៩ កន្លង​ទៅ Ronaldo សម្រេច​គ្រាប់​បាល់​សរុប​បាន ២៨ គ្រាប់​និង Assist ១០ លើក នៅ ៤៣ ប្រកួត ស្រប​ពេល​រដូវ​កាល​ថ្មី​មាន​ការ​ចុះ​ថមថយ​ជាង​មុន ហើយ​ចំណាត់ថ្នាក់​របស់​សេះ​បង្កង់​បច្ចុប្បន្ន​ក៏​ធ្លាក់​ចុះ​មក​លេខ ២ ថែម​ទៀត៕ ប្រភព៖ FoxSportAsia

ភ្ជាប់ទំនាក់ទំនងជាមួយ CTS SPORT