នៅការប្រកួតរវាងក្លឹប RCD Mallorca និង Barcelona កន្លងទៅដែលបញ្ចប់ក្រោមលទ្ធផល ៥-២ ខ្សែប្រយុទ្ធវ័យក្មេង Kubo ក៏ទទួលបានការស្រែកបញ្ឈឺនិងរំខានជាខ្លាំងអំឡុងការប្រកួត តាមរយៈថ្វីមាត់របស់អ្នកគាំទ្រនៃក្លឹបអ្នកមានបុណ្យ។
ដើមចមក៏ទំនងពាក់ព័ន្ធនឹងរឿងដែល Kubo បានបដិសេធសំណើមិនផ្លាស់មកចូលរួមនៅ Barcelona (ក្លឹបបង្វឹកខ្លួនកាលពីអតីតកាល) ហើយក្រសោបយកក្លឹប Real Madrid ដែលជាក្លឹបគូប្រជែង។
ឆ្លើយតបក្រោយបិទការប្រកួត Kubo និយាយថា៖ “ខ្ញុំជាអ្នកធ្វើការសម្រេចចិត្តគ្រប់យ៉ាង ហើយពួកគេក៏មានសិទ្ធស្រែកមកលើខ្ញុំ ពិតណាស់ខ្ញុំគិតថាខ្ញុំសក្តិសមនឹងទទួលយករឿងបែបនេះ ទាំងដែលអ្នកគាំទ្រខ្លះក៏បង្ហាញការសាទរនិងគាំទ្រដល់ខ្ញុំផងដែរ”។
យុវជនសញ្ជាតិជប៉ុនបន្ថែម៖ “តើវាអាក្រក់ដែរទេ? ចម្លើយគឺអត់ ព្រោះពួកគេមើលមកខ្ញុំនាមជាគូប្រជែង មិនមែនជាក្មេងប្រុស ១៨ ឆ្នាំម្នាក់ទេ”។
បញ្ជាក់ថា Kubo ក៏បានបង្ហាញទម្រង់លេងយ៉ាងល្អផងដែរ ត្បិតអីទទួលបរាជ័យហើយសកម្មភាពមួយនៅលើទីលានទាក់ទិននឹងការកិបស៊ីប្រឡោះជើងរបស់ M10 ក៏មានការជជែកយ៉ាងច្រើនដូចគ្នា៕ ប្រភព៖ Marca